ന്യൂഡൽഹി: പ്രധാനമന്ത്രി നരേന്ദ്രമോദി അമേരിക്ക സന്ദർശിക്കും. ഈ മാസം അവസാനം സന്ദർശനം ഉണ്ടായിരിക്കുമെന്നാണ് കേന്ദ്രസർക്കാരുമായി ബന്ധപ്പെട്ട വൃത്തങ്ങൾ നൽകുന്ന വിവരം. അമേരിക്കൻ പ്രസിഡന്റായി ജോ ബൈഡൻ ചുമതലയേറ്റതിന് ശേഷമുള്ള പ്രധാനമന്ത്രിയുടെ ആദ്യ സന്ദർശനമാണിത്. ജോ ബൈഡനുമായും പ്രധാനമന്ത്രി കൂടിക്കാഴ്ച്ച നടത്തിയേക്കും.
സെപ്തംബർ 22 മുതൽ 27 വരെയാണ് സന്ദർശനം. അഫ്ഗാനിലെ സ്ഥിതിഗതികൾ മാറിക്കൊണ്ടിരിക്കുന്ന സാഹചര്യത്തിലാണ് പ്രധാനമന്ത്രിയുടെ യുഎസ് സന്ദർശനമെന്നത് ശ്രദ്ധേയമാണ്. ബൈഡനുമായുള്ള പ്രധാനമന്ത്രി നരേന്ദ്രമോദിയുടെ ആദ്യ കൂടിക്കാഴ്ച്ചയാണിത്. പ്രസിഡന്റായി ചുമതല ഏറ്റതിന് ശേഷം ബൈഡനുമായി പ്രധാനമന്ത്രി ചർച്ചകളിൽ ഏർപ്പെട്ടിരുന്നു. എന്നാൽ കൊറോണ മഹാമാരിയുടെ പശ്ചാത്തലത്തിൽ വെർച്വൽ യോഗങ്ങളായിരുന്നു അതെല്ലാം.
ബൈഡനു പുറമേ, യുഎസ് ഭരണകൂടത്തിലെ ഉന്നത ഉദ്യോഗസ്ഥരുമായും അദ്ദേഹം സുപ്രധാന കൂടിക്കാഴ്ചകൾ നടത്തിയേക്കും. അതേസമയം പ്രധാനമന്ത്രിയുടെ യുഎസ് സന്ദർശനവുമായി ബന്ധപ്പെട്ട് കേന്ദ്രസർക്കാരിന്റെ ഭാഗത്ത് നിന്നും ഔദ്യോഗിക സ്ഥിരീകരണം ഉണ്ടായിട്ടില്ല. 2019 സെപ്റ്റംബറിലാണ് പ്രധാനമന്ത്രി അവസാനമായി അമേരിക്ക സന്ദർശിച്ചത്.
