തിരുവനന്തപുരം : എല്ലാവർക്കും ശുദ്ധജലം ലഭ്യമാക്കുക ലക്ഷ്യമിട്ട് കേന്ദ്രസർക്കാർ ആരംഭിച്ച ജൽ ജീവൻ മിഷൻ പദ്ധതി സംസ്ഥാന സർക്കാർ അട്ടിമറിക്കുന്നതായി ബിജെപി. പദ്ധതി നടപ്പാക്കാൻ കേരളം വിമുഖത പ്രകടിപ്പിക്കുകയാണെന്ന് ബിജെപി സംസ്ഥാന ജനറൽ സെക്രട്ടറി പി. സുധീർ പറഞ്ഞു.
ജൽ ജീവൻ മിഷൻ പദ്ധതിയുടെ 50 ശതമാനം വീതം കേന്ദ്ര-സംസ്ഥാന സർക്കാരുകൾ വഹിക്കണം. ഇതിന്റെ അടിസ്ഥാനത്തിൽ കേന്ദ്രസർക്കാർ നൽകിയ രണ്ട് ഗഡുക്കൾ സംസ്ഥാനം വകമാറ്റി ചിലവഴിക്കുകയായിരുന്നു. കൂടാതെ കേന്ദ്രനിർദ്ദേശങ്ങൾ പാലിക്കാതെ കൂടുതൽ വാട്ടർ കണക്ഷൻ നൽകി ജനങ്ങളെ കബളിപ്പിക്കുകയും ചെയ്തു. പദ്ധതിയുടെ പരിധിക്ക് അകത്തുനിന്ന് കണക്ഷനുകൾ കൊടുക്കുന്നതിന് പകരം കൂടുതൽ കണക്ഷനുകൾ അനുവദിക്കുന്നു എന്ന പേരിൽ പദ്ധതിയെ തന്നെ അട്ടിമറിക്കാനാണ് സംസ്ഥാന സർക്കാർ ശ്രമിക്കുന്നതെന്നും സുധീർ ചൂണ്ടിക്കാട്ടി.
പദ്ധതി നടത്തിപ്പിലെ മുഖ്യഘടകമായ ഗ്രാമപഞ്ചായത്തുകൾക്ക് അടിസ്ഥാന വിവരങ്ങൾ പോലും നൽകുവാൻ നോഡൽ ഏജൻസിയായ കേരള വാട്ടർ അതോറിറ്റിക്ക് കഴിഞ്ഞിട്ടില്ല. ഇത് ഗുരുതരമായ വീഴ്ചയാണ്. ഗ്രാമപഞ്ചായത്തുകളുടെ സഹകരണത്തോടെ എല്ലാ ഗ്രാമങ്ങളിലും കുടിവെള്ളമെത്തിക്കുക എന്നതാണ് കേന്ദ്രസർക്കാരിന്റെ ലക്ഷ്യമെന്നും അദ്ദേഹം പറഞ്ഞു.
സംസ്ഥാന വിഹിതം ഗ്രാമപഞ്ചായത്തുകളുടെ തലയിൽ ഇട്ട് രക്ഷപ്പെടാനാണ് സർക്കാർ ശ്രമിക്കുന്നത്. അതുകൊണ്ടാണ് പഞ്ചായത്ത് വിഹിതം 15 ശതമാനമായി ഉയർത്തിയത്. 5 മുതൽ 10 കോടി രൂപ വരെ പഞ്ചായത്തുകൾ അവരുടെ വിഹിതമായി നൽകേണ്ടി വരുമെന്നതിനാൽ തദ്ദേശ സ്ഥാപനങ്ങൾ പദ്ധതിയിൽ നിന്നും പിൻവാങ്ങുന്ന സാഹചര്യമാണുള്ളതെന്നും സുധീർ കൂട്ടിച്ചേർത്തു.
