ചെന്നൈ: തമിഴ് സിനിമയിലെ മികച്ച നടന്മാരിൽ ഒരാളായ ശിവാജി ഗണേശന്റെ 93-ാം പിറന്നാളിൽ ആദരമർപ്പിച്ച് ഗൂഗിൾ ഡൂഡിൽ. ഗൂഗിൾ ഇന്ത്യയും ബെംഗളൂരുവിൽ നിന്നുള്ള കലാകാരനുമായ നൂപുർ രാജേഷ് ചോക്‌സിയും ചേർന്നാണ് ഡൂഡിൽ രൂപ കല്പന ചെയ്തത്.
1928 ഒക്ടോബർ ഒന്നിനാണ് ഇന്ത്യൻ സിനിമയുടെ മാർലോൺ ബ്രാൻഡോ എന്നറിയപ്പെടുന്ന ശിവാജി ഗണേശൻ ജനിച്ചത്. വി. ചിന്നയ്യ മൺറയാർ ഗണേശമൂർത്തി എന്നാണ് അദ്ദേഹത്തിന്റെ യഥാർത്ഥ നാമം. ‘ശിവാജി കണ്ട ഹിന്ദുരാജ്യം’ എന്ന നാടകത്തിലെ മികച്ച പ്രകടനത്തിനുശേഷമാണ് ഗണേശൻ ‘ശിവാജി’ എന്ന പേരിൽ അറിയപ്പെടാൻ തുടങ്ങിയത്.
1952ൽ പുറത്തിറങ്ങിയ ‘പരാശക്തി’ ആണ് അദ്ദേഹത്തിന്റെ ആദ്യ ചിത്രം. അഞ്ച് ദശാബ്ദം നീണ്ടു നിന്ന സിനിമ ജീവിതത്തിൽ തമിഴ്, ഹിന്ദി, തെലുങ്ക്, മലയാളം, കന്നഡ എന്നീ ഭാഷകളിലായി മുന്നൂറോളം ചിത്രങ്ങളിൽ ഗണേശൻ അഭിനയിച്ചു. 1999ൽ പുറത്തിറങ്ങിയ തമിഴ് ചിത്രം ‘പൂപ്പറിക വരുഗിറോം’ ആണ് അദ്ദേഹത്തിന്റെ അവസാന ചിത്രം. 2001 ജൂലൈ 21നായിരുന്നു അന്ത്യം.
1962ൽ ഇന്ത്യയുടെ സാംസ്‌കാരിക പ്രതിനിധിയായി അദ്ദേഹം യുഎസ് സന്ദർശിച്ചു. അന്നത്തെ പ്രസിഡന്റ് ജോൺ എഫ് കെന്നഡിയുടെ ക്ഷണ പ്രകാരം യുഎസിൽ എത്തുന്ന ആദ്യ ഇന്ത്യൻ കലാകാരനാണ് ഗണേശൻ. അന്താരാഷ്‌ട്ര ചലച്ചിത്രമേളയിൽ മികച്ച നടനുള്ള പുരസ്‌കാരം കരസ്ഥമാക്കിയ ഇന്ത്യയിലെ ആദ്യ നടനും കൂടിയാണ് ഗണേശൻ.
അഭിനേതാവ് എന്നതിലുപരി മികച്ച നർത്തകനുമായിരുന്നു ഗണേശൻ. ഭരതനാട്യം, കഥക്, മണിപ്പൂരി എന്നീ നൃത്ത രൂപങ്ങളിൽ പ്രാവീണ്യം നേടിയ അതുല്യ പ്രതിഭയായിരുന്നു അദ്ദേഹം.
