വെയിലിൽ നിന്നും മഴയിൽ നിന്നും രക്ഷനേടാൻ നൂറ്റാണ്ടുകൾക്ക് മുൻപ് തന്നെ മനുഷ്യർ കുട ഉപയോഗിച്ചിരുന്നുവെന്നാണ് പറയപ്പെടുന്നത്. ഇത് സത്യമാണെന്ന് തെളിയിക്കുന്ന രേഖകൾ ചരിത്രകാരൻമാർക്ക് ലഭിച്ചിട്ടുണ്ടെന്നാണ് വിവരം. 15ാം നൂറ്റാണ്ടു മുതൽ ഈജിപ്ത്, അസീറിയ,ഗ്രീസ്, ചൈന എന്നിവിടങ്ങളിൽ കുടകൾ പ്രചാരത്തിലുണ്ടായിരുന്നതായി ചില ചരിത്ര പുസ്തകങ്ങളിലും രേഖപ്പെടുത്തിയിട്ടുണ്ട്.
എന്നാൽ ആദ്യകാലത്ത് ഉണ്ടായിരുന്ന കുടകളെല്ലാം സൂര്യപ്രകാശത്തിൽ നിന്നു മാത്രം നമ്മെ സംരക്ഷിക്കുന്നവയായിരുന്നു. പിന്നീട് ബിസിഇ 1000 ത്തിലാണ് മഴയത്ത് ഉപയോഗിക്കാൻ കഴിയുന്ന കുടകൾ കണ്ടുപിടിച്ചത്. ചൈനാക്കാരാണ് മഴയത്ത് ഉപയോഗിക്കാൻ സാധിക്കുന്ന കുടകളുടെ നിർമ്മാതാക്കൾ. ചേമ്പില പോലെയുള്ള സസ്യങ്ങളുടെ ഇലകളായിരുന്നു ഇവരെ ഈ കണ്ടുപിടിത്തത്തിലേക്ക് നയിച്ചത്.മെഴുക് പുരട്ടിയും, പോളിഷ് ചെയ്തുമായിരുന്നു ഇത്തരം കുടകൾ നിർമ്മിച്ചിരുന്നത്.അതിനാൽ കുടയിൽ വീഴുന്ന വെള്ളം അതിൽ തങ്ങാതെ താഴേക്ക് ഒലിച്ചിറങ്ങുമായിരുന്നു..
16ാം നൂറ്റാണ്ടുമുതൽ പാശ്ചാത്യ രാജ്യങ്ങളിലും കുടയ്ക്ക് വലിയ പ്രചാരം ലഭിക്കാൻ ആരംഭിച്ചു. ഈ കാലത്താണ് കുടയ്ക്ക് അംബ്രേല്ല എന്ന പേര് ലഭിച്ചത്. ലത്തീൻ ഭാഷയിൽ അംബ്രേല എന്നാൽ നിഴൽ എന്നാണ് അർത്ഥം.. നിഴലായി വർത്തിച്ച് മനുഷ്യ ശരീരത്തെ സൂര്യരശ്മികളിൽ നിന്നും രക്ഷിക്കുന്ന ഒന്നായാണ് കുടയെ കരുതിയിരുന്നത്.
16 ാം നൂറ്റാണ്ടിൽ യൂറോപ്യൻ രാജ്യങ്ങളിൽ കുടയ്ക്ക് വലിയ പ്രചാരം ലഭിച്ചെങ്കിലും സ്ത്രീകൾ മാത്രമാണ് ഇത് ഉപയോഗിച്ചിരുന്നത്. ഈ കാലഘട്ടത്തിലാണ് പേർഷ്യയിൽ നിന്നുള്ള വിനോദ സഞ്ചാരിയും എഴുത്തുകാരനുമായ ജോനാസ് ഹാൻവേ ഇംഗ്ലണ്ട് സന്ദർശിക്കുന്നത്. ഇവിടെയെത്തിയ അദ്ദേഹം പരസ്യമായി കുട ഉപയോഗിക്കാൻ ആരംഭിച്ചു.ഇതോടെയാണ് മറ്റുള്ള പുരുഷൻമാരും കുട ഉപയോഗിക്കാൻ ആരംഭിച്ചത്. മരത്തടികൾ, വലിയ മത്സ്യങ്ങളുടെ മുള്ളുകൾ, എണ്ണ നിറമുള്ള ക്യാൻവാസുകൾ എന്നിവ ഉപയോഗിച്ചാണ് യൂറോപ്പിൽ ആദ്യകാല കുടകൾ നിർമ്മിച്ചിരുന്നത്.
1830 മുതലാണ് കുടകൾക്ക് വലിയ പ്രചാരം ലഭിക്കാൻ ആരംഭിച്ചത്. കുടകളുടെ വ്യാപാരം ആരംഭിച്ചതും ഇതോടെയാണ്, ലണ്ടനിലെ ന്യൂ ഓക്സ്ഫോർഡ് തെരുവിൽ സ്ഥിതിചെയ്തിരുന്ന ജെയിംസ് സ്മിത്ത് ആന്റ് സൺസ് എന്ന സ്ഥാപനമാണ് ലോകത്ത് ആ്ദ്യമായി കുടകൾ വിൽപ്പന നടത്താൻ ആരംഭിച്ചത്.
നൈലോണിന്റെ കണ്ടുപിടിത്തത്തോടെയാണ് ഇന്ന് കാണുന്ന തരത്തിലുള്ള കുടകളുടെ നിർമ്മാണം ആരംഭിച്ചത്. നൈലോണിന്റെ കണ്ടുപിടിത്തത്തിന് ശേഷം വിവിധ വർണങ്ങളിലും ഡിസൈനുകളിലുമുള്ള കുടകൾ വിപണിയ്ിൽ ലഭ്യമാകാൻ ആരംഭിച്ചു. കുടകൾക്ക് പ്രചാരം വർദ്ധിച്ചതോടെ കൂടുതൽ കമ്പനികൾ കുട നിർമ്മാണത്തിലേക്ക് തിരിഞഞു.. ക്രമേണ ഇത് കമ്പനികൾ തമ്മിലുള്ള മത്സരത്തിലേക്കാണ് വഴിവെച്ചത്… ഈ മത്സരത്തിന്റെ ഭാഗമായി വിവിധ തരം കുടകൾ നമ്മുടെ വിപണിയിൽ ലഭ്യമാകാൻ ആരംഭിച്ചു.
പണ്ട് കുടകൾ കയ്യിൽ കൊണ്ടു നടക്കുക എന്നത് ഏറെ പ്രയാസകരമായിരുന്നു. കാരണം അത്രയേറെ നീളം കുടകൾക്ക് ഉണ്ടായിരുന്നു. എന്നാൽ ഇന്ന് കേവലം പോക്കറ്റിൽ വരെ കൊണ്ടുനടക്കാവുന്ന കുടകൾവരെ വിപണിയിൽ ലഭ്യമാണ്.
Comments