ടി20 റെക്കോർഡുകൾ തകർത്തെറിഞ്ഞ് ന്യൂസിലാൻഡ് താരം ഫിൻ അലന്റെ വെടിക്കെട്ട് ബാറ്റിംഗ്. മേജർ ലീഗ് ക്രിക്കറ്റ് 2025 സീസണിന്റെ ഉദ്ഘാടന മത്സരത്തിലാണ് ന്യൂസിലൻഡ് താരം അവിശ്വസനീയ പ്രകടനം കാഴ്ചവച്ചത്. വെറും 49 പന്തിൽ നിന്ന് 150 റൺസ് നേടി ടി20 ചരിത്രത്തിലെ ഏറ്റവും വേഗതയേറിയ 150 റൺസ് പ്രകടനമെന്ന റെക്കോർഡും ടി20 ഇന്നിംഗ്സിൽ ഏറ്റവും കൂടുതൽ സിക്സറുകൾ നേടിയ താരമെന്ന റെക്കോർഡും അലൻ സ്വന്തമാക്കി.
മത്സരത്തിൽ സാൻ ഫ്രാൻസിസ്കോ യൂണികോൺസിനായി കളിക്കുന്ന കിവി താരം വാഷിംഗ്ടൺ ഫ്രീഡം ബൗളർമാരെ നിലം തൊടീച്ചില്ല. ഒന്നിനുപിറകെ ഒന്നായി 19 സിക്സുകളാണ് അലന്റെ ബാറ്റിൽ പിറന്നത്. ടി20 ഇതിഹാസം ക്രിസ് ഗെയ്ലിന്റെയും എസ്റ്റോണിയയുടെ സാഹിൽ ചൗഹാന്റെയും 18 സിക്സറുകൾ എന്ന റെക്കോർഡ് പഴങ്കഥയായി. തന്റെ 20-ാമത്തെ സിക്സർ നേടാൻ ശ്രമിച്ചാണ് 26 കാരൻ വലംകൈയ്യൻ ബാറ്റർ പുറത്തായത്.
Finn Allen’s out here breaking records 💯 He smashed the fastest century in MLC history for the @SFOUnicorns! 🔥 pic.twitter.com/SVyQ9n99Rf
— Cognizant Major League Cricket (@MLCricket) June 13, 2025
അലന്റെ വെടിക്കെട്ടിന്റെ പിൻബലത്തിൽ, സാൻ ഫ്രാൻസിസ്കോ യൂണികോൺസ് 20 ഓവറിൽ 269/5 എന്ന സ്കോർ നേടി. അന്താരാഷ്ട്ര ക്രിക്കറ്റിലും മിന്നും പ്രകടനങ്ങൾകൊണ്ട് താരം റെക്കോർഡുകൾ സ്വന്തമാക്കിയിട്ടുണ്ട്. 2024 ജനുവരിയിൽ, പാകിസ്ഥാനെതിരെ 62 പന്തിൽ നിന്ന് 137 റൺസ് നേടിയ ഫിൻ അലൻ ബ്രണ്ടൻ മക്കല്ലത്തിന്റെ റെക്കോർഡ് സ്വന്തംപേരിലാക്കി. നിലവിൽ 1,000 ൽ കൂടുതൽ റൺസ് നേടിയ എല്ലാ ടി20 ബാറ്റർമാരിലും ഏറ്റവും മികച്ച സ്ട്രൈക്ക് റേറ്റാണ് ഇപ്പോൾ കൈവശം വച്ചിരിക്കുന്നത്.
