ന്യൂഡൽഹി: കുടിവെള്ളത്തിനായി സ്ത്രീകൾ കുടങ്ങളുമേന്തി കിലോമീറ്ററുകൾ നടക്കുന്ന കാഴ്ച ഇനി പഴങ്കഥയാകും.രാജ്യത്തെ ജനങ്ങൾക്ക് ശുദ്ധജല ലഭ്യത ഉറപ്പാക്കുന്ന ജൽ ജീവൻ മിഷൻ ആപ്പ് ഇന്ന് പ്രധാനമന്ത്രി നരേന്ദ്ര മോദി പുറത്തിറക്കി.ജൽ ജീവൻ മിഷൻ ആപ്പ് സ്ത്രീ ശാക്തീകരണ പ്രവർത്തനങ്ങളിൽ പുതിയൊരു കാൽവെപ്പാകുമെന്ന് പ്രധാനമന്ത്രി ചടങ്ങിൽ വ്യക്തമാക്കി.
പണച്ചിലവില്ലാതെ കുടിവെള്ളം വീട്ടുമുറ്റത്ത് ഉറപ്പാക്കുന്ന കേന്ദ്ര സർക്കാർ പദ്ധതിയാണ് ജലജീവൻ മിഷൻ. ഗ്രാമീണ ജനതയുടെ പ്രത്യേകിച്ച് സ്ത്രീകളുടേയും പെൺകുട്ടികളുടേയും ജീവിതം മെച്ചപ്പെടുത്തുക എന്ന ലക്ഷ്യത്തോടെ നടപ്പിലാക്കുന്ന പദ്ധതിയാണിത്. പദ്ധതി പ്രകാരം 55 ലിറ്ററിലധികം ശുദ്ധജലമാണ് ദിനംപ്രതി ലഭ്യമാവുക.
പദ്ധതിയിലൂടെ ഇതുവരെ 80 ജില്ലകളിലെ ഒന്നരലക്ഷം ഗ്രാമങ്ങളിലെ എല്ലാ വീടുകളിലും ശുദ്ധജലം എത്തിക്കാൻ സാധിച്ചിട്ടുണ്ട്. 2024 ഓടെ ഇത് എല്ലാ വീടുകളിലേക്കും വ്യാപിപ്പിക്കാനാണ് കേന്ദ്രസർക്കാരിന്റെ ലക്ഷ്യമിടുന്നത്..
എപിഎൽ ബിപിഎൽ വ്യത്യാസമില്ലാതെ ആധാർ കാർഡ് മാത്രം നൽകി എല്ലാവർക്കും കുടിവെള്ള കണക്ഷൻ ലഭിക്കുമെന്നതാണ് പദ്ധതിയുടെ പ്രധാന സവിശേഷത.
കഴിഞ്ഞ വർഷം ചെങ്കോട്ടയിൽ സ്വാതന്ത്ര ദിന ആഘോഷ വേദിയിലാണ് പ്രധാനമന്ത്രി നരേന്ദ്ര മോദി 3.5 ലക്ഷം കോടി രൂപയുടെ വിപ്ലവകരമായ പദ്ധതി പ്രഖ്യാപിച്ചത്. കേന്ദ്ര കുടിവെള്ള ശുചിത്വ മന്ത്രാലയത്തിന്റെ കീഴിലാണ് പദ്ധതി. പദ്ധതിയുടെ ഉടമസ്ഥ ഉത്തരവാദിത്ത്വം ഗ്രാമ പഞ്ചായത്തിനും ഗുണഭോക്തൃ സമിതികൾക്കും ആയതിനാൽ കണക്ഷൻ എടുക്കുന്നതിന് പഞ്ചായത്ത് ഓഫിസിൽ സമീപിച്ചാണ് അപേക്ഷ നൽകേണ്ടത്.
