ടിവി കാണുമ്പോഴും സിനിമ കാണുമ്പോഴുമെല്ലാം എന്തെങ്കിലും കൊറിച്ചുകൊണ്ടിരിക്കുക നമ്മുടെ ശീലമാണ്. ഇങ്ങിനെ കൊറിക്കാൻ പൊട്ടറ്റോ ചിപ്സ് ആയാലോ..ആഹാ അടിപൊളി അല്ലേ. വളരെ ചുരുങ്ങിയ കാലം കൊണ്ട് ഭക്ഷണ പ്രിയരുടെ ഇഷ്ടവിഭവമായി ഉരുളക്കിഴങ്ങ് ചിപ്സ് മാറിയതിന് പിന്നിൽ ആരും അറിയാത്ത ഒരു കഥയുണ്ട്. വേൾഡ് ഓഫ് ഇൻവെൻഷൻസിന്റെ ഈ അദ്ധ്യായത്തിൽ ഈ കഥയാണ് നാം പരിചയപ്പെടാൻ പോകുന്നത്.
1853 മുതലാണ് പൊട്ടറ്റോ ചിപ്സുകൾ പ്രചാരത്തിൽ വന്നത്. അമേരിക്കകാരനായ ജോർജ് ക്രം ആണ് ആദ്യമായി പൊട്ടറ്റോ ചിപ്സുകൾ വികസിപ്പിച്ചെടുത്തത്.1853 ൽ ന്യൂയോർക്കിലെ സറാട്ടാഗോ സ്പ്രിംഗ്സ് എന്ന വിനോദ സഞ്ചാര സത്രത്തിൽ നടന്ന വിരുന്നിനിടെയായിരുന്നു അദ്ദേഹം ആദ്യമായി ഇത്തരം ചിപ്സുകൾ വിളമ്പിയത്. പിന്നീട് അങ്ങോട്ട് ന്യൂയോർക്ക് ജനതയുടെ മാത്രമല്ല ലോകജനതയുടെ തന്നെ ഇഷ്ടവിഭവമായി പൊട്ടറ്റോ ചിപ്സുകൾ മാറി.
അന്നത്തെ കാലത്ത് ഭക്ഷണങ്ങളിൽ ഏറ്റവും പ്രധാനപ്പെട്ട ഒരു വിഭവം ആയിരുന്നു ഉരുളക്കിഴങ്ങുകൊണ്ടുള്ള ഫ്രഞ്ച് ഫ്രൈഡ് പൊറ്റട്ടോ. സറാട്ടാഗോ സ്പ്രിംഗ്സിൽ നടന്ന പാർട്ടിയിലും ക്രമ്മും സംഘവും ആളുകൾക്ക് ഇത് നൽകി. ഫ്രഞ്ച് ഫ്രൈഡ് പൊട്ടറ്റോകൾക്കായി ഇന്ന് കാണുന്ന രീതിയിലല്ല ഉരുളക്കിഴങ്ങുകൾ മുറിച്ചിരുന്നത്. കനം കൂടിയ കഷ്ണങ്ങളായി മുറിച്ചായിരുന്നു ഈ വിഭവം തയ്യാറാക്കിയിരുന്നത്.
വിരുന്നിൽ പങ്കെടുത്ത കോമഡോർ കോർനേലിയസ് എന്നയാൾ ഉരുളക്കിഴങ്ങിന് കട്ടികൂടിയെന്ന് പറഞ്ഞ് ഫ്രഞ്ച് ഫ്രൈഡ് പൊട്ടറ്റോകൾ അടുക്കളയിലേക്ക് തന്നെ തിരിച്ചയച്ചു. കഴിക്കാൻ ബുദ്ധിമുട്ടാണെന്നും ശരിയാംവിധം പാകമായിട്ടില്ലെന്നും അദ്ദേഹം ക്രമ്മിനോട് പരാതിയും പറഞ്ഞു. ഇത് കേട്ട ക്രം ഉരുളക്കിഴങ്ങ് നേർത്ത കഷ്ണങ്ങളായി മുറിച്ച് എണ്ണയിൽ വറുത്ത് അദ്ദേഹത്തിന് നൽകി. ക്രം നൽകിയ പുതിയ വിഭവം വളരെ ആസ്വദിച്ചാണ് കോർനേലിയസ് കഴിച്ചത്. ഇവിടെ നിന്നായിരുന്നു പൊറ്റട്ടോ ചിപ്സുകൾ ലോകപ്രശസ്തിയാർജ്ജിക്കാൻ ആരംഭിച്ചത്.
ഇന്ന് കാണുന്നതു പോലെ പായ്‌ക്കറ്റിലുളള ചിപ്സുകൾ പ്രചാരത്തിൽ വന്നത് 1926 ലാണ്. അമേരിക്കക്കാരിയായ സ്‌കഡ്ഡർ ആണ് ഇതിന് തുടക്കമിട്ട്ത്. മെഴുകു പേപ്പറിൽ പൊതിഞ്ഞായിരുന്നു ഇവർ ആളുകൾക്ക് പൊട്ടറ്റോ ചിപ്സുകൾ നൽകിയിരുന്നത് . ഇതേ കാലഘട്ടത്തിൽ അമേരിക്കയിൽ എത്തിയ ഹെർമൻ ലേ എന്ന വ്യാപാരി അമേരിക്കയിലെ പ്രധാന നഗരങ്ങളിലെല്ലാം പൊട്ടറ്റോ ചിപ്സുകൾ കൊണ്ടു നടന്ന് വിൽക്കാൻ ആരംഭിച്ചു. . തന്റെ കാറിൽ തയ്യാറാക്കിയ ഒരു പെട്ടിയിലായിരുന്നു അദ്ദേഹം ഇവ സൂക്ഷിച്ചിരുന്നത്. പിന്നീട് ഹെർമൻ ലേ എന്ന പേരിൽ ഒരു പൊട്ടറ്റോ ചിപ്സ് കമ്പനിയും ആരംഭിച്ചു. ആഗോളതലത്തിൽ ഈ ഭക്ഷ്യവിഭവത്തിന് പ്രചാരം ലഭിക്കുന്നതിൽ അദ്ദേഹത്തിന്റെ കമ്പനി വലിയ പങ്കാണ് വഹിച്ചത്.
ഇന്ന് പലതരം പൊട്ടറ്റോ ചിപ്സുകൾ നമ്മുടെ വിപണിയിൽ ലഭ്യമാണ്. വിവിധ രുചികളിൽ ലഭിക്കുന്ന ഇത്തരം ചിപ്സുകളുടെ അടിമകളാണ് ഇന്നത്തെ തലമുറ എന്നുതന്നെ പറയാം. എന്നാൽ ഇന്ന് പായ്‌ക്കറ്റുകളിൽ ലഭിക്കുന്ന പ്രമുഖ കമ്പനികളുടെയുൾപ്പെടെയുള്ള പൊട്ടറ്റോ ചിപ്സുകൾ വലിയ ആരോഗ്യപ്രശ്നങ്ങൾക്കാണ് കാരണമാകാറുള്ളത്. ഫാസ്റ്റ് ഫുഡ് വിഭാഗത്തിൽ ഉൾപ്പെടുത്തിയിരിക്കുന്ന ഇത്തരം ചിപ്സുകളുടെ അമിത ഉപയോഗം കാൻസറിന് കാരണമാകുമെന്നാണ് പഠനങ്ങൾ പറയുന്നത്.
Comments