ന്യൂഡൽഹി : പശ്ചിമ ബംഗാൾ മുഖ്യമന്ത്രി മമത ബാനർജിയെ രൂക്ഷമായി വിമർശിച്ച് കോൺഗ്രസ് ലോക്സഭാ കക്ഷി നേതാവ് അധിർ രഞ്ജൻ ചൗധരി. കോൺഗ്രസിനെ മമത കോൺഗ്രസ് ആക്കി മാറ്റാനാണ് മമത ബാനർജി ശ്രമിക്കുന്നത് എന്ന് അദ്ദേഹം പറഞ്ഞു. ദേശീയ മാദ്ധ്യമത്തിന് നൽകിയ അഭിമുഖത്തിലായിരുന്നു കോൺഗ്രസ് നേതാവിന്റെ പരാമർശം.
ഇന്ത്യയുടെ വിവിധ ഭാഗങ്ങളിൽ നിന്നുള്ള കോൺഗ്രസ് നേതാക്കളെ സ്വാധീനിച്ചും ആകർഷിച്ചും കോൺഗ്രസിനെ കോൺഗ്രസ് (എം) ആക്കാനുള്ള ശ്രമങ്ങളാണ് മമത നടത്തക്കുന്നത്. ഇതിലൂടെ നരേന്ദ്ര മോദിയുടെ അധികാരം നിലനിർത്താൻ സഹായിക്കുന്ന ഉപകരണമായി മമത മാറുകയാണ്. നേരത്തെയും മമതയ്ക്ക് ബിജെപിയുമായി സഖ്യമുണ്ടായിരുന്നു. പ്രതിപക്ഷ സഖ്യത്തിൽ കൂടുതൽ കുഴപ്പങ്ങൾ ഉണ്ടാക്കാനാണ് മമത ശ്രമിക്കുന്നത് എന്നും അധിർ രഞ്ജൻ ചൗധരി പറഞ്ഞു.
കോൺഗ്രസിൽ സ്ഥാനം നൽകിക്കൊണ്ട് മമതയെ ഉയർത്തിക്കൊണ്ട് വന്നത് രാജീവ് ഗാന്ധിയാണെന്നത് ഓർക്കണം. പിന്നീട് കോൺഗ്രസ് നേതൃത്വം നൽകിയ യുപിഎയിൽ മമതയ്ക്ക് മന്ത്രിപദം ലഭിച്ചു. ഇപ്പോൾ അതേ വ്യക്തി തന്നെ തന്റെ രാഷ്ട്രീയ താത്പര്യത്തിനു വേണ്ടി കോൺഗ്രസിനെ പിന്നിൽ നിന്ന് കുത്തുകയാണെന്നും അധിർ രഞ്ജൻ ചൗധരി കൂട്ടിച്ചേർത്തു.
