മുംബൈ: ആഡംബര കപ്പലിലെ ലഹരി വേട്ടയിൽ അറസ്റ്റിലായി ജയിലിൽ കഴിയുന്ന ആര്യൻ ഖാനെ അമ്മ ഗൗരി ഖാൻ സന്ദർശിക്കാൻ എത്തുന്നതായി റിപ്പോർട്ട്. കഴിഞ്ഞ ദിവസമാണ് പിതാവും ബോളിവുഡ് താരവുമായ ഷാറൂഖ് ഖാൻ മകനെ സന്ദർശിക്കാൻ ആർതർ റോഡ് ജയിലിൽ എത്തിയത്. ആര്യൻ അറസ്റ്റിലായതിനുശേഷം ആദ്യമായാണ് ഷാറൂഖ് സന്ദർശനത്തിനെത്തിയത്.
ഈ മാസം രണ്ടാം തീയതിയാണ് മുംബൈയിലെ ആഡംബര കപ്പലിലെ ലഹരി പാർട്ടിക്കിടെ നടന്ന എൻസിബി റെയ്ഡിൽ ഷാരൂഖ് ഖാന്റെ മകൻ ഉൾപ്പെടെ എട്ട് പേർ പിടിയിലാകുന്നത്. കേസിൽ ഇതുവരെ 20 പേരാണ് അറസ്റ്റിലായിട്ടുള്ളത്. ആര്യൻ ഖാൻ രാജ്യാന്തര ലഹരിമരുന്ന് മാഫിയയുടെ കണ്ണിയാണെന്നാണ് ജാമ്യം എതിർത്ത് എൻസിബി കോടതിയിൽ വാദിച്ചത്.
അന്വേഷണം പുരോഗമിക്കുമ്പോൾ കേസ് വഴിത്തിരിവിൽ നിന്നും വഴിത്തിരിവിലേയ്ക്കാണ് പോകുന്നത്. കേസിൽ ബോളിവുഡ് താരം അനന്യ പാണ്ഡെയെ എൻസിബി ഇന്നും ചോദ്യം ചെയ്യുമെന്ന് അറിയിച്ചിരുന്നു. ആര്യൻ ഖാനും അനന്യയും തമ്മിൽ ലഹരിമരുന്നുമായി ബന്ധപ്പെട്ട് നടത്തിയ വാട്സ്ആപ്പ് ചാറ്റുകൾ അന്വേഷണ ഉദ്യോഗസ്ഥർ കണ്ടെത്തിയിരുന്നു. ഇതിന്റെ പശ്ചാത്തലത്തിലാണ് അനന്യയെ ചോദ്യം ചെയ്യുന്നത്. ഇത് മൂന്നാം തവണയാണ് കേസിൽ അനന്യയെ ചോദ്യം ചെയ്യുന്നത്.
