ഇടുക്കി: ശബരിമല മണ്ഡല-മകരവിളക്ക് തീര്‍ത്ഥാടനത്തിന് ദിവസങ്ങള്‍ മാത്രം ശേഷിക്കെ, സത്രം-പുല്ലുമേട് തീര്‍ത്ഥാടന പാത തകര്‍ന്നുതരിപ്പണമായി. റോഡില്‍ വലിയ കുഴികള്‍ രൂപപ്പെട്ടതോടെ തീര്‍ത്ഥാടകരും വിനോദസഞ്ചാരികളും ഒരുപോലെ ദുരിതത്തിലായിരിക്കുകയാണ്. സീസണ്‍ തിരക്ക് ആരംഭിക്കുന്നതിന് മുമ്പ് റോഡ് സഞ്ചാരയോഗ്യമാക്കണമെന്ന ആവശ്യം ശക്തമാകുന്നു. സത്രം, പുല്ലുമേട് വഴി ശബരിമലയിലെത്തുന്ന പതിനായിരക്കണക്കിന് ഭക്തര്‍ ആശ്രയിക്കുന്ന പ്രധാന പാതയാണിത്. എന്നാല്‍ റോഡിന്റെ അറ്റകുറ്റപ്പണികള്‍ കൃത്യമായി നടക്കുന്നില്ലെന്നാണ് പ്രദേശവാസികളുടെ പ്രധാന പരാതി. റോഡ് പൂര്‍ണമായും തകര്‍ന്ന നിലയിലാണ്. വലിയ കുഴികളില്‍ മഴവെള്ളം കെട്ടിക്കിടക്കുന്നതും ചെളിക്കുഴികള്‍ രൂപപ്പെട്ടിരിക്കുന്നതും യാത്ര ദുഷ്‌കരമാക്കുന്നു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പെരിയാര്‍ കടുവാ സങ്കേതത്തോട് ചേര്‍ന്നുകിടക്കുന്ന ഈ മേഖലയിലെ റോഡ് അടിയന്തരമായി നന്നാക്കണമെന്നാണ് നാട്ടുകാരുടെയും വിവിധ ഹൈന്ദവ സംഘടനകളുടെയും ആവശ്യം. തീര്‍ത്ഥാടന സീസണില്‍ ഭക്തരുടെ തിരക്ക് വര്‍ധിക്കുന്നതോടെ യാത്രാദുരിതം രൂക്ഷമാകുമെന്ന ആശങ്കയും ഉയരുന്നുണ്ട്. റോഡ് ടാറിങ് ഉള്‍പ്പെടെയുള്ള അറ്റകുറ്റപ്പണികള്‍ അടിയന്തരമായി പൂര്‍ത്തിയാക്കിയില്ലെങ്കില്‍ തീര്‍ത്ഥാടകര്‍ക്ക് വലിയ ബുദ്ധിമുട്ട് നേരിടേണ്ടിവരുമെന്നാണ് മുന്നറിയിപ്പ്. അധികൃതര്‍ ഉടന്‍ ഇടപെട്ട് നടപടി സ്വീകരിച്ചില്ലെങ്കില്‍ ശക്തമായ സമരപരിപാടികളിലേക്ക് കടക്കുമെന്നും പ്രദേശവാസികളും ഹൈന്ദവ സംഘടനകളും അറിയിച്ചിട്ടുണ്ട്.
