മോഹൻലാലിനെ നായകനാക്കി ബി. ഉണ്ണികൃഷ്ണൻ സംവിധാനം ചെയ്യുന്ന ചിത്രം ആറാട്ടിന്റെ റീലീസ് തീയതി പ്രഖ്യാപിച്ചു. ഫെബ്രുവരി 10ന് ചിത്രം തീയേറ്ററിൽ തന്നെ റിലീസ് ചെയ്യുമെന്ന് ഉണ്ണികൃഷ്ണൻ അറിയിച്ചു. കഴിഞ്ഞ വർഷം ആദ്യം റിലീസ് ചെയ്ത ബിഗ് ബ്രദറിന് ശേഷം തീയേറ്ററിൽ റിലീസിനെത്തുന്ന മോഹൻലാൽ ചിത്രം കൂടിയാണിത്.
നേരത്തെ ഒക്ടോബർ 14ന് റിലീസ് തീയതി പ്രഖ്യാപിച്ചിരുന്നത്. കൊറോണ പ്രതിസന്ധി മൂലം നീട്ടിവെയ്ക്കുകയായിരുന്നു. വില്ലൻ എന്ന സിനിമയ്ക്ക് ശേഷം മോഹൻലാലും ബി ഉണ്ണകൃഷ്ണനും ഒന്നിക്കുന്ന ചിത്രമാണ് ആറാട്ട്. ‘നെയ്യാറ്റിൻകര ഗോപന്റെ ആറാട്ട്’ എന്നാണ് സിനിമയുടെ മുഴുവൻ പേര്. ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം.
18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്. നെടുമുടി വേണു, സായി കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, ഷീല, സ്വാസിക, തുടങ്ങി നിരവധി താരങ്ങൾ ചിത്രത്തിലുണ്ട്. മോഹൻലാൽ നിറഞ്ഞാടി അഭിനയിക്കുന്ന മാസ് മസാല ചിത്രമാണിതെന്നാണ് തിരക്കഥയെഴുതിയിരിക്കുന്ന ഉദയകൃഷ്ണ പറഞ്ഞത്. കൊറോണ പ്രതിസന്ധിയിൽ നഷ്ടത്തിലായിരുന്ന സിനിമാ മേഖലയ്ക്ക് പ്രതീക്ഷ നൽകുകയാണ് ആറാട്ടിന്റെ തീയേറ്റർ റിലീസ് പ്രഖ്യാപനം.
