ഇന്നലെ അന്തരിച്ച കന്നഡ സൂപ്പർതാരം പുനീത് രാജ്കുമാറിന്റെ സംസ്കാരം ഞായറാഴ്ച നടക്കും. കർണാടക മുഖ്യമന്ത്രി ബസവരാജ് ബൊമ്മെ ആണ് ഇക്കാര്യം അറിയിച്ചത്. ശ്രീകണ്ഡീരവ സ്റ്റേഡിയത്തിലാണ് സംസ്കാരച്ചടങ്ങുകൾ നടക്കുക.
പുനീത് രാജ്കുമാറിന്റെ മകൾ യുഎസിൽ നിന്ന് ബംഗളൂരുവിലെത്താൻ വൈകിട്ട് ഏഴ് മണിയാകും. ആചാരപ്രകാരം സൂര്യാസ്തമയം കഴിഞ്ഞാൽ സംസ്കാരം നടത്താൻ കഴിയില്ലെന്നും അതിനാലാണ് ഞായറാഴ്ചയിലേക്ക് മാറ്റിയതെന്നും മുഖ്യമന്ത്രി പറഞ്ഞു.
അനിഷ്ട സംഭവങ്ങളും ആരാധകരുടെ അമിത വികാര പ്രകടനങ്ങളും നിയന്ത്രിക്കാൻ കർശന സുരക്ഷ ഏർപ്പെടുത്തിയാകും സംസ്കാരം. അതുകൊണ്ടു തന്നെ ഔദ്യോഗിക ബഹുമതികൾ അടക്കം ഇന്ന് നടത്താനും സാദ്ധ്യതയുണ്ട്.
ഇന്നലെയാണ് ഹൃദയാഘാതത്തെ തുടർന്ന് 46 കാരനായ പുനീത് രാജ്കുമാർ മരിച്ചത്. കണ്ഡീരവ സ്റ്റേഡിയത്തിൽ ഇപ്പോഴും ആയിരങ്ങളാണ് പ്രിയതാരത്തിന് അന്ത്യാഞ്ജലി അർപ്പിക്കാൻ എത്തുന്നത്. ആദരസൂചകമായി കർണാടകയിൽ ഇന്ന് പൊതു അവധിയും പ്രഖ്യാപിച്ചിരുന്നു.
