വാഷിംഗ്ടൺ : പ്രകൃതിക്കുമേലുള്ള കടന്നുകയറ്റവും ഫോസിൽ ഇന്ധനങ്ങളുടെ അമിത ഉപയോഗവും കുറയ്‌ക്കേണ്ട സമയം അതിക്രമിച്ചെന്ന് യുഎൻ സെക്രട്ടറി ജനറൽ ആന്റോണിയോ ഗുട്ടെറെസ. പ്രകൃതിക്ക് മേലുള്ള കടന്നുകയറ്റത്തിലൂടെ മനുഷ്യൻ സ്വന്തം കുഴി തോണ്ടുകയാണെന്ന് അദ്ദേഹം ചൂണ്ടിക്കാട്ടി.
സ്‌കോട്ട്ലൻഡിലെ ഗ്ലാസ്ഗോയിൽ യുഎന്നിന്റെ കോപ് 26 കാലാവസ്ഥാ ഉച്ചകോടിയുടെ ഉദ്ഘാടന വേളയിലാണ് ഗുട്ടെറസിന്റെ ഈ പരാമർശം.ഫോസിൽ ഇന്ധനങ്ങളോടുള്ള മനുഷ്യന്റെ ആസക്തി മനുഷ്യകുലത്തെ നാശത്തിലേക്ക് തള്ളിവിടുകയാണ്.മുഴുവൻ മനുഷ്യ കുലത്തിന്റെയും ഭാവിക്ക് വേണ്ടി ഇതിന് തടയിടേണ്ട സമയം അതിക്രമിച്ചെന്ന് അദ്ദേഹം കൂട്ടിച്ചേർത്തു.
ഇത്തരം പ്രവർത്തനങ്ങൾ മതിയാക്കേണ്ട സമയമായി. പ്രകൃതിക്ക് വേണ്ടി ഉണർന്ന് പ്രവർത്തിക്കണമെന്ന് അദ്ദേഹം ചൂണ്ടിക്കാട്ടി. ആഴത്തിൽ കത്തിച്ചും തുരന്നും കാർബൺ ഉൽപ്പാദിപ്പിച്ചും മനുഷ്യൻ പ്രകൃതിയിൽ തന്റെ ശവക്കുഴി തോണ്ടുകയാണെന്ന് അദ്ദേഹം വ്യക്തമാക്കി.
യുഎൻ കാലാവസ്ഥാ ഉച്ചകോടിയായ കോപ് 26 ഒക്ടോബർ 31 മുതൽ നവംബർ 12 വരെ ബ്രിട്ടനിലെ ഗ്ലാസ്‌ഗോയിലാണ് നടക്കുന്നത്. 120 രാഷ്‌ട്രത്തലവന്മാർ ഇതിൽ പങ്കെടുക്കും.
