ഗ്ലാസ്‌ഗോ: കോപ്-26 ഉച്ചകോടിയുടെ പശ്ചാത്തലത്തിൽ പ്രധാനമന്ത്രി നരേന്ദ്രമോദിയും ബ്രിട്ടീഷ് പ്രധാനമന്ത്രി ബോറിസ് ജോൺസണും കൂടിക്കാഴ്ച നടത്തി. മേഖലാപരവും ആഗോളപരവുമായ വെല്ലുവിളികൾ ഇരുവരും ചർച്ച ചെയ്തു. 26ാ-ാമത് കാലാവസ്ഥ ഉച്ചകോടി വിജയകരമായി സംഘടിപ്പിച്ചതിന് അഭിനന്ദനങ്ങളും ഉഭയകക്ഷി ചർച്ചകൾക്കിടെ ബ്രിട്ടീഷ് പ്രധാനമന്ത്രിയോട് മോദി അറിയിച്ചു.
ഇരുവരുടെയും കൂടിക്കാഴ്ചക്കിടെ അഫ്ഗാൻ വിഷയം, തീവ്രവാദം, ഇന്തോ-പസഫിക്, കൊറോണാനന്തര ആഗോള സാമ്പത്തികം എന്നിവ ചർച്ചയായി. ഹരിത ഹൈഡ്രജൻ, ക്ലീൻ-ടെക്‌നോളജി എന്നിവയും സാമ്പത്തികം, പ്രതിരോധം എന്നീ വിഷയങ്ങളും കൂടിക്കാഴ്ചയിൽ ചർച്ച ചെയ്തതായി വിദേശകാര്യ മന്ത്രാലയം വക്താവ് അരിന്ദം ബാഗ്ചി അറിയിച്ചു.
തിങ്കളാഴ്ച പുലർച്ചെയാണ് ഉച്ചകോടിയിൽ പങ്കെടുക്കാൻ മോദി പ്രത്യേക വിമാനത്തിൽ ഗ്ലാസ്‌ഗോവിലെത്തിയത്. ബ്രിട്ടണിലെ ഇന്ത്യൻ സമൂഹം പ്രധാനമന്ത്രിക്ക് ഊഷ്മള സ്വീകരണം നൽകിയിരുന്നു.
