ന്യൂഡൽഹി : യുനെസ്കോ ക്രിയേറ്റീവ് സിറ്റീസ് നെറ്റ്വർക്കിൽ (യുസിസിഎൻ) ഇടം നേടി ശ്രീനഗർ. കരകൗശല രംഗത്തെ മികവും, നാടോടി കലാരൂപങ്ങളും പരിഗണിച്ചാണ് ശ്രീനഗറിനെ യുഎൻസിസിയിൽ ഉൾപ്പെടുത്തിയത്. ശ്രീനഗറിനൊപ്പം ലോകത്തെ 48 നഗരങ്ങളെകൂടി പട്ടികയിൽ ഉൾപ്പെടുത്തിയിട്ടുണ്ട്.
ശ്രീനഗർ യുസിസിഎന്നിൽ ഇടം നേടിയ വിവരം യുനെസ്കോ ഡയറക്ടർ ജനറൽ ഓഡ്രി അസോലെയാണ് അറിയിച്ചത്. വികസനത്തിന്റെ മുഖ്യകേന്ദ്രമായി സംസ്കാരത്തെ എന്നും കാത്തുസൂക്ഷിക്കുന്ന നഗരമാണ് ശ്രീനഗർ. ഇതാണ് നഗരത്തെ പട്ടികയിൽ ഉൾപ്പെടുത്താൻ കാരണമെന്നും അദ്ദേഹം പറഞ്ഞു. 90 രാജ്യങ്ങളിലെ 256 നഗരങ്ങളാണ് സ്വന്തം സംസ്കാരം കാത്തുസൂക്ഷിക്കുന്നതിന് സംഭാവനകൾ നൽകുന്നതെന്ന് യുനെസ്കോ പുറത്തിറക്കിയ പ്രസ്താവനയിൽ പറയുന്നു. 49 നഗരങ്ങളെകൂടി പട്ടികയിൽ ഉൾപ്പെടുത്തിയതോടെ യുസിസിഎന്നിൽ ഇടം നേടിയ നഗരങ്ങളുടെ എണ്ണം 246 ആയി ഉയർന്നു.
യുസിസിഎന്നിൽ ശ്രീനഗർ ഇടം നേടിയതിൽ പ്രധാനമന്ത്രി നരേന്ദ്രമോദി ജനങ്ങളെ അഭിനന്ദിച്ചു. കരകൗശലമേഖലയിലെ മികവിന്റെയും, കലാരൂപങ്ങളുടെയും പേരിൽ യുസിസിഎന്നിൽ ശ്രീനഗർ ഇടം നേടിയെന്ന വാർത്ത അതിയായ സന്തോഷം നൽകുന്നതാണ്. ശ്രീനഗറിന്റെ സംസ്കാരത്തിനും പാരമ്പര്യത്തിനും ലഭിച്ച അർഹമായ അംഗീകാരമാണ് ഇതെന്നും പ്രധാനമന്ത്രി ട്വീറ്റ് ചെയ്തു.
പ്രധാനമന്ത്രിയ്ക്ക് പുറമേ കേന്ദ്രമന്ത്രി കിഷൻ റെഡ്ഡിയും സന്തോഷം പ്രകടിപ്പിച്ച് രംഗത്ത് വന്നിട്ടുണ്ട്. രാജ്യത്തിന് വളരെ അഭിമാനകരമായ നിമിഷമാണ് ഇതെന്ന് കിഷൻ റെഡ്ഡി ട്വിറ്ററിൽ കുറിച്ചു.
Delighted that beautiful Srinagar joins the @UNESCO Creative Cities Network (UCCN) with a special mention for its craft and folk art. It is a fitting recognition for the vibrant cultural ethos of Srinagar. Congratulations to the people of Jammu and Kashmir.
— Narendra Modi (@narendramodi) November 8, 2021
