ഗുവാഹത്തി: പൊന്നിനെയും കടത്തി വെട്ടുന്ന തേയിലയുടെ വില കേട്ട് അന്തംവിട്ട് ചായപ്രേമികൾ. അസമിൽ നിന്നുള്ള സ്പെഷ്യാലിറ്റി ചായയായ മനോഹരി ഗോൾഡ് വിറ്റ തേയിലയ്ക്ക് ഒരു കിലോഗ്രാമിന്റെ വില 99,999 രൂപയാണ്. അതായത് ഒരു ലക്ഷത്തിന് ഒരു രൂപ മാത്രം കുറവ്. ഈ ആഴ്ച ഗുവാഹത്തി ടീ ലേലകേന്ദ്രത്തിൽ നടന്ന ലേലത്തിലാണ് റെക്കോർഡ് തുക ലഭിച്ചത്. എക്കാലത്തെയും ഉയർന്ന റെക്കോർഡ് വിലയ്ക്കാണ് തേയില വിറ്റത്. ഇന്ത്യയിൽ ലേലത്തിൽ വച്ചിരിക്കുന്ന ഒരു തേയില ഇനത്തിന്റെ ഏറ്റവും ഉയർന്ന വിലയാണിത്.
അസമിലെ ദിബ്രുഗഢിലെ എസ്റ്റേറ്റുകളിൽ തേയില കൃഷി ചെയ്യുന്ന മനോഹരി ടീ എസ്റ്റേറ്റ് ഒരു കിലോഗ്രാം സൗരഭ് ടീ ട്രേഡേഴ്സിന് വിറ്റ തേയിലയ്ക്കാണ് റെക്കോർഡ് വില ലഭിച്ചത്. റെക്കോഡ് വില ട്വിറ്ററിൽ ചർച്ചാവിഷയമായി, പ്രത്യേകിച്ച് ചായപ്രേമികൾക്കിടയിൽ. ഇത്തരം പ്രീമിയം ഗുണനിലവാരമുള്ള സ്പെഷ്യാലിറ്റി ചായയ്ക്ക് ഉപഭോക്താക്കളിൽ നിന്നും പരിചയക്കാരിൽ നിന്നുമുള്ള ഉയർന്ന ഡിമാൻഡിനെ അടിസ്ഥാനമാക്കിയാണ് ഞങ്ങൾ ചായ നിർമ്മിക്കുന്നതെന്ന് മനോഹരി ടീ എസ്റ്റേറ്റ് ഉടമ രാജൻ ലോഹ്യ പറഞ്ഞു.
തിളങ്ങുന്ന മഞ്ഞ നിറത്തിലുളള ചായക്ക് മികച്ച രുചിയാണെന്നും നിരവധി ആരോഗ്യപ്രദമാണെന്നും അദ്ദേഹം വ്യക്തമാക്കി. 2019 ജൂലൈയിൽ ഗുവാഹത്തി തേയില ലേലത്തിൽ കിലോഗ്രാമിന് 50,000 രൂപയായിരുന്നു ഇതുവരെയുളള റെക്കോർഡ്. അത് അക്കാലത്തെ ഏറ്റവും ഉയർന്ന ലേല മൂല്യമായിരുന്നു.
2018-ൽ ഇതേ ചായ ഒരു കിലോഗ്രാം 39,001 രൂപയ്ക്ക് വിറ്റിരുന്നു. ഉയർന്ന ഗുണമേന്മയുള്ള പി 126 ടീ ക്ലോണുകളിൽ നിന്നാണ് മനോഹരി ഗോൾഡ് ടീ തേയില കൃഷി ചെയ്യുന്നത്. മെയ്, ജൂൺ മാസങ്ങളിലെ രണ്ടാം ഫ്ലഷ് സീസണിൽ അതിരാവിലെ കൈകൊണ്ടാണ് തേയില നുളളിയെടുക്കുന്നത്.
