ബ്രിട്ടൺ: കൊറോണ വ്യാപനത്തിന് അയവില്ലാതെ യുണൈറ്റഡ് കിങ്ഡം. വെള്ളിയാഴ്ച മാത്രം 93,045 പുതിയ കൊറോണ കേസുകളാണ് യുകെയിൽ സ്ഥിരീകരിച്ചത്. 111 മരണവും റിപ്പോർട്ട് ചെയ്തിട്ടുണ്ട്. ആദ്യമായാണ് 90,000ത്തിന് മേൽ കൊറോണ രോഗികൾ ഒരുദിവസം റിപ്പോർട്ട് ചെയ്തത്.
കഴിഞ്ഞ മൂന്ന് ദിവസമായി വളരെ വലിയ തോതിലാണ് രോഗബാധ സ്ഥിരീകരിക്കുന്നത്. ഓരോ ദിവസവും റിപ്പോർട്ട് ചെയ്യുന്നതിനേക്കാൾ പതിനായിരത്തോളം കൂടുതൽ രോഗികളാണ് അടുത്ത ദിവസം സ്ഥിരീകരിക്കപ്പെടുന്നത്. പ്രതിദിനം അയ്യായിരത്തോളം ഒമിക്രോൺ കേസുകളും യുകെയിൽ ഉണ്ടാകുന്നുണ്ട്. ഒമിക്രോൺ വകഭേദത്തിന്റെ വ്യാപനശേഷിയെയും തീവ്രതയെയും കുറിച്ച് ആരോഗ്യവിദഗ്ധർ മുന്നറിയിപ്പ് നൽകിയതിനെ സാധൂകരിക്കുന്ന തരത്തിലാണ് കൊറോണ നിരക്കുകൾ പുറത്തുവരുന്നത്.
ദക്ഷിണാഫ്രിക്കയ്ക്ക് ശേഷം ഒമിക്രോൺ അതിഭീകരമായി പടർന്നുപിടിക്കുന്ന രാജ്യമായി മാറിയിരിക്കുകയാണ് ബ്രിട്ടൺ. താരതമ്യേന കൊറോണ മരണ നിരക്ക് കുറവാണെങ്കിലും രോഗികൾ കൂടുന്നതിനാൽ ആശുപത്രി കിടക്കകൾ നിറയുന്ന സാഹചര്യമാണ് സംജാതമാകുന്നത്.
