ഉത്തർ പ്രദേശിൽ ആറ് മാസത്തേക്ക് പണിമുടക്കുകൾ നിരോധിച്ച് യോഗി സർക്കാർ ഉത്തരവിട്ടു.സംസ്ഥാനത്ത് എസ്മ നിയമം ചുമത്തി.കൊറോണ സാഹചര്യത്തിൽ ആണ് അവശ്യസേവന പരിപാലന നിയമം(എസ്മ ) സംസ്ഥാനത്ത് നിലവിൽ വരുന്നതെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു.
അഡീഷണൽ ചീഫ് സെക്രട്ടറി ഡോ.ദേവേഷ് കുമാർ ചതുർവേദി ഞായറാഴ്ച ഇത് സംബന്ധിച്ച വിജ്ഞാപനം പുറപ്പെടുവിച്ചു.കഴിഞ്ഞ വർഷവും യോഗി ആദിത്യനാഥ് സർക്കാർ എസ്മ പ്രയോഗിച്ച് ആറ് മാസത്തേക്ക് പണിമുടക്ക് നിരോധിച്ചിരുന്നു.പൊതു ജനസേവനങ്ങളുമായി ബന്ധപ്പെട്ട സ്ഥാപനങ്ങളിലാണ് നിയമം നടപ്പിലാവുക. ഉത്തരവുകൾ ലംഘിക്കുന്നവർ നിയമനടപടി നേരിടേണ്ടിവരുമെന്നും വിജ്ഞാപനത്തിൽ മുന്നറിയിപ്പ് നൽകിയിട്ടുണ്ട്.
അവശ്യ സേവനങ്ങളുമായി ബന്ധപ്പെട്ട ജോലിയിൽ ഏർപ്പെട്ടിരിക്കുന്നവർ പണിമുടക്കുകയോ ജോലി ചെയ്യാൻ വിസമ്മതിക്കുകയോ ചെയ്താൽ കർശന നടപടി എടുക്കാൻ എസ്മ നിയമം സംസ്ഥാന സർക്കാരിന് അധികാരം നൽകുന്നുണ്ട്.വ്യവസ്ഥകൾ ലംഘിക്കുന്നതായി കണ്ടെത്തിയാൽ വാറന്റില്ലാതെ ആരെയും അറസ്റ്റ് ചെയ്യാൻ പോലീസിന് സാധിക്കും.എസ്മ പ്രകാരം നിർബന്ധിത തടവോ ഒരു വർഷം വരെ തടവോ അല്ലെങ്കിൽ 1,000 രൂപ പിഴയോ അല്ലെങ്കിൽ രണ്ടും കൂടിയോ നൽകാനുള്ള വ്യവസ്ഥയുണ്ട്.
Comments