ന്യൂഡൽഹി: കേന്ദ്ര ധനമന്ത്രി നിർമല സാതാരാമൻ ഇന്ന് പ്രമുഖ സാമ്പത്തിക വിദഗ്ധരുമായി പ്രീബജറ്റ് കൂടിയാലോചന നടത്തും. 2022-2023 ലെ പൊതു ബജറ്റുമായി ബന്ധപ്പെട്ടാണ് മന്ത്രി പ്രമുഖ സാമ്പത്തിക വിദഗ്ധരുമായ കൂടിയാലോചന നടത്തുന്നത്.ഇന്ന് ഉച്ചയ്ക്ക് ഡൽഹിയിൽ വെച്ചാണ് യോഗം നടക്കുക.
ഈ മാസം 15 മുതൽ കേന്ദ്ര മന്ത്രി വിവിധ മേഖലകളില പ്രതിനിധികളുമായി ബജറ്റിന് മുൻപുള്ള കൂടിയാലോചനകൾ നടത്തി വരികയാണ്. കൊറോണ മഹാമാരി ബാധിച്ച മേഖലകൾ പുനരുജ്ജീവിപ്പിക്കാൻ ഉള്ള പദ്ധതികൾ ആസൂത്രണം ചെയ്യുന്നതിനായാണ് ദിവസങ്ങളായി മന്ത്രി ചർച്ച നടത്തുന്നത്.
വ്യവസായ സംഘടനകൾ,കാർഷിക സംഘടനകൾ,സേവനമേഖലയിലെ വിദഗ്ധർ തുടങ്ങിയവരുമായാണ് നിരന്തരമായ ചർച്ച നടത്തുന്നത്. അടുത്ത വർഷം ഫെബ്രുവരി ഒന്നിനാണ് കേന്ദ്ര ബജറ്റ് അവതരിപ്പിക്കുക. ധനമന്ത്രിക്ക് പുറമേ പ്രധാനമന്ത്രി നരേന്ദ്രമോദിയും വ്യവസായ പ്രമുഖരുമായി കൂടിക്കാഴ്ച നടത്തുന്നുണ്ട്.
ഒളിമ്പിക്സിൽ രാജ്യം ഒരു പോഡിയം ഫിനിഷിനായി ആഗ്രഹിക്കുന്നതുപോലെ, എല്ലാ മേഖലകളിലും ലോകത്തിലെ മികച്ച അഞ്ച് വ്യവസായങ്ങളിൽ നമ്മുടെ വ്യവസായങ്ങളെ കാണാൻ രാജ്യം ആഗ്രഹിക്കുന്നു, ഇതിനായി നമ്മൾ കൂട്ടായി പ്രവർത്തിക്കണമെന്നാണ് പ്രധാനമന്ത്രി കഴിഞ്ഞ ദിവസത്തെ യോഗത്തിന് ശേഷം അഭിപ്രായപ്പെട്ടത്. വിലയേറിയ അഭിപ്രായങ്ങളും നിർദ്ദേശങ്ങളും നൽകിയ വിദഗ്ധർക്ക് അദ്ദേഹം നന്ദി പറഞ്ഞു.
