ന്യൂയോർക്ക്: പ്രീമിയം ആഡംബര ഹോട്ടലായ മന്ദാരിൻ ഓറിയന്റലിനെ ഏറ്റെടുക്കാനുളള കരാറിൽ ഏർപ്പെട്ടതായി മുകേഷ് അംബാനിയുടെ നേതൃത്വത്തിലുള്ള റിലയൻസ് ഇൻഡസ്ട്രീസ് അറിയിച്ചു. ഹോട്ടൽ ഏറ്റെടുക്കുന്നത് 98 ദശലക്ഷം ഡോളറിന്(727 കോടി രൂപ ) ആണ്. റിലയൻസ് ഇൻഡസ്ട്രിയൽ ഇൻവെസ്റ്റ്മെന്റ് ആൻഡ് ഹോൾഡിംഗ്സ് ലിമിറ്റഡ് കേമാൻ ദ്വീപുകൾ ആസഥാനമായി പ്രവർത്തിക്കുന്ന കമ്പനിയായ കൊളംബസ് സെന്റർ കോർപ്പറേഷന്റെ (കേമാൻ) മുഴുവൻ ഓഹരി മൂലധനവും ഏറ്റെടുക്കാൻ കരാറിൽ ഏർപ്പെട്ടതായി ഇരു കമ്പനികളും അറിയിച്ചു. ന്യൂയോർക്കിലെ മന്ദാരിൻ ഓറിയന്റലിന്റെ 73.37 ശതമാനം ഓഹരിയുടെ ഉടമ കൊളംബസ് സെന്റർ കോർപ്പറേഷനാണ് .
റിലയൻസിന്റെ ഉപഭോക്തൃ, ഹോസ്പിറ്റാലിറ്റി മേഖല വികസിപ്പിക്കുന്നതിനുള്ള തന്ത്രത്തിന്റെ ഭാഗമാണ് ഈ ഏറ്റെടുക്കൽ. ഗ്രൂപ്പിന് ഒബറോയ് ഹോട്ടൽസിൽ നിക്ഷേപമുണ്ട്, കൂടാതെ ബക്കിംഗ്ഹാംഷെയറിലെ 300 ഏക്കർ സ്റ്റോക്ക് പാർക്ക് കൺട്രി ക്ലബ്ബും സ്വന്തമാക്കിയിട്ടുണ്ട്. മുംബൈയിലെ ബാന്ദ്ര-കുർള കോംപ്ലക്സിൽ കൺവെൻഷൻ സെന്റർ, ഹോട്ടൽ, നിയന്ത്രിത വസതികൾ എന്നിവയും റിലയൻസ് വികസിപ്പിക്കുന്നുണ്ട്.
ന്യൂയോർക്കിൽ സെൻട്രൽ പാർക്കിനോടും കൊളംബസ് സർക്കിളിനോടും നേരിട്ട് 80 കൊളംബസ് സർക്കിളിലാണ് മാൻഡാരിൻ ഓറിയന്റൽ സ്ഥിതി ചെയ്യുന്നത്. 2018ൽ 115 മില്യൺ ഡോളറും 2019ൽ 113 മില്യൺ ഡോളറും 2020ൽ 15 മില്യൺ ഡോളറും വരുമാനം നേടിയിട്ടുണ്ട്. 2003ൽ സ്ഥാപിതമായ ഹോട്ടലിന് ആഗോള അംഗീകാരമുണ്ടെന്നും നിരവധി പുരസ്കാരങ്ങൾ നേടിയിട്ടുണ്ടെന്നും റിലയൻസ് പ്രസ്താവനയിൽ പറഞ്ഞു.
