ഗുജറാത്തിൽ റിലയൻസ് 5.95 ലക്ഷം കോടി രൂപയുടെ നിക്ഷേപം നടത്തും; 10 ലക്ഷം തൊഴിലവസരം സൃഷ്ടിക്കുമെന്ന് കമ്പനി

ഗാന്ധിനഗർ: മുകേഷ് അംബാനിയുടെ നേതൃത്വത്തിലുള്ള റിലയൻസ് ഇൻഡസ്ട്രീസ് ലിമിറ്റഡ് (ആർഐഎൽ) ഗുജറാത്തിൽ ആറ് ലക്ഷം കോടിയുടെ നിക്ഷേപം നടത്തും. സർക്കാരുമായി ചേർന്ന് സംസ്ഥാനത്ത് 6 ലക്ഷം കോടി രൂപയുടെ നിക്ഷേപം നടത്താനുള്ള കരാറിൽ ഒപ്പുവച്ചതായി ആർഐഎൽ കമ്പനി പ്രസ്താവനയിൽ പറഞ്ഞു. ഗുജറാത്തിനെ ‘നെറ്റ് സീറോ’ ആയും കാർബൺ വിമുക്തമാക്കുക എന്ന ലക്ഷ്യത്തോടെ റിലയൻസ് അടുത്ത 10-15 വർഷത്തിനുള്ളിൽ സംസ്ഥാനത്ത് 5 ലക്ഷം കോടി രൂപയുടെ നിക്ഷേപം നടത്തും. 100 ജിഗാവാട്ട് പുനരുപയോഗ ഊർജപദ്ധതികൾ സ്ഥാപിക്കാനും ഹരിത ഹൈഡ്രജൻ ഇക്കോ സിസ്റ്റം വികസിപ്പിക്കാനും നിക്ഷേപമിറക്കും.

ചെറുകിട, ഇടത്തരം സംരംഭങ്ങളെ (എസ്എംഇ) സഹായിക്കുന്നതിന് ആർഐഎൽ ഒരു ഇക്കോ സിസ്റ്റം വികസിപ്പിക്കുകയും നവീകരിക്കാവുന്ന ഊർജത്തിന്റെയും ഗ്രീൻ ഹൈഡ്രജന്റെയും ഉപയോഗത്തിലേക്ക് നയിക്കുന്ന പുതിയ സാങ്കേതികവിദ്യകളും നൂതനാശയങ്ങളും സ്വീകരിക്കാൻ സംരംഭകരെ പ്രോത്സാഹിപ്പിക്കുകയും ചെയ്യുമെന്ന് കമ്പനി വ്യക്തമാക്കി.

ഗുജറാത്ത് സർക്കാരുമായി കൂടിയാലോചിച്ച് കച്ച്, ബനസ്‌കന്ത, ധോലേര എന്നിവിടങ്ങളിൽ 100 ജിഗാവാട്ട് പുനരുപയോഗ ഊർജ്ജ പദ്ധതിക്കായി ഭൂമി പരിശോധിക്കുന്നതിനുള്ള നടപടികൾ ആർഐഎൽ ആരംഭിച്ചു. കച്ചിൽ 4.5 ലക്ഷം ഏക്കർ ഭൂമിയാണ് കമ്പനി ആവശ്യപ്പെട്ടിരിക്കുന്നത്. സംസ്ഥാനത്ത് നിക്ഷേപം നടത്താൻ ആഗോള നിക്ഷേപകരെ ക്ഷണിക്കുന്നതിനായി സംസ്ഥാന സർക്കാർ എല്ലാ വർഷവും സംഘടിപ്പിക്കുന്ന ഉച്ചകോടിയായ വൈബ്രന്റ് ഗുജറാത്തിന്റെ പത്താം പതിപ്പിന്റെ ഭാഗമായിരുന്നു ധാരണാപത്രങ്ങൾ. മൂന്ന് ദിവസത്തെ ഉച്ചകോടി ജനുവരി 10ന് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യാനിരുന്നെങ്കിലും വർദ്ധിച്ചുവരുന്ന കൊറോണ കേസുകൾക്കിടയിൽ മാറ്റിവച്ചു.

പോളിസിലിക്കൺ, വേഫർ, സെൽ, സോളാർ പവർ പ്രോജക്ടുകൾക്കുള്ള മൊഡ്യൂളുകൾ, ഇലക്ട്രോലൈസർ യൂണിറ്റ്, എനർജി സ്റ്റോറേജ് യൂണിറ്റുകൾ എന്നിവയുടെ നിർമ്മാണം ഉൾപ്പെടെ പുതിയതും പുനരുപയോഗിക്കാവുന്നതുമായ ഊർജത്തിനായി പുതിയ സംയോജിത ഉൽപ്പാദന യൂണിറ്റ് സ്ഥാപിക്കാൻ 60,000 കോടി രൂപ കൂടി നിക്ഷേപിക്കാൻ പ്രതിജ്ഞാബദ്ധമാണെന്ന് കമ്പനി കൂട്ടിച്ചേർത്തു.

2035 ഓടെ ‘നെറ്റ് കാർബൺ ന്യൂട്രൽ’ ആക്കി മാറ്റാൻ സഹായിക്കുന്ന ഒരു പുതിയ ക്ലീൻ എനർജി ബിസിനസ് കെട്ടിപ്പടുക്കുന്നതിനായി അടുത്ത മൂന്ന് വർഷത്തിനുള്ളിൽ 75,000 കോടി രൂപ നിക്ഷേപിക്കുന്നതിനുള്ള കമ്പനിയുടെ അതിമോഹമായ പദ്ധതിയുടെ ഭാഗമാണ് വ്യാഴാഴ്ച കമ്പനി പ്രഖ്യാപിച്ച ശുദ്ധഊർജ്ജ നിക്ഷേപങ്ങൾ.

അടുത്ത മൂന്നോ അഞ്ചോ വർഷത്തിനുള്ളിൽ നിലവിലുള്ള പദ്ധതികളിലും പുതിയ സംരംഭങ്ങളിലും റിലയൻസ് 25,000 കോടി രൂപയുടെ നിക്ഷേപം നടത്തും. ജിയോ നെറ്റ്വർക്ക് 5ജിയിലേക്ക് നവീകരിക്കുന്നതിനായി മൂന്ന് മുതൽ അഞ്ച് വർഷം കൊണ്ട് 7,500 കോടി രൂപയും നിക്ഷേപിക്കും. ഗുജറാത്തിലെ റിലയൻസ് റീട്ടെയിലിൽ അഞ്ച് വർഷത്തിനുള്ളിൽ 3,000 കോടി രൂപയും നിക്ഷേപിക്കാനും കമ്പനി പദ്ധതിയിടുന്നു. ഈ നിക്ഷേപം ഗുജറാത്തിൽ 10 ലക്ഷം തൊഴിലവസരങ്ങൾ സൃഷ്ടിക്കുമെന്ന് കമ്പനി അറിയിച്ചു.