ആരാധകർ ഒന്നടങ്കം കാത്തിരിക്കുന്ന മോഹൻലാൽ- പൃഥ്വിരാജ് ചിത്രമാണ് ബ്രോ ഡാഡി. ചിത്രത്തിന്റെ ഗാനങ്ങളും ട്രെയിലറും ആരാധകർ ഏറ്റെടുത്തിരുന്നു. ജനുവരി 26നാണ് ചിത്രം റിലീസ് ചെയ്യുന്നത്. ഇപ്പോഴിതാ ബ്രോഡാഡിയുടെ രസകരമായൊരു വീഡിയോ പുറത്തുവിട്ടിരിക്കുകയാണ് അണിയറ പ്രവർത്തകർ.
ചിത്രത്തിൽ ആന്റണി പെരുമ്പാവൂരിന്റെ ക്യാരക്ടർ വെളിപ്പെടുത്തുന്ന വീഡിയോയാണ് പുറത്തുവിട്ടിരിക്കുന്നത്. എസ്‌ഐ ആന്റണി എന്ന കഥാപാത്രമായാണ് ആന്റണി പെരുമ്പാവൂർ എത്തുന്നത്. എങ്ങനെയാണ് ആന്റണി പെരുമ്പാവൂരിനെ എസ്‌ഐ ആന്റണിയാക്കിയതെന്നാണ് വീഡിയോയിൽ പറയുന്നത്.
ബ്രോ ഡാഡിയുടെ പ്രൊഡക്ഷനായി ആന്റണി പെരുമ്പാവൂരിനെ കാണാൻ പോവുന്നതും, രണ്ട് സിനിമകൾ കഴിഞ്ഞ് മാത്രമേ ഈ പടം ചെയ്യാൻ പറ്റൂ എന്ന് പറയുന്ന ആന്റണി പെരുമ്പാവൂരിനെ ‘ മാസ് പോലീസ് വേഷം’ കൊടുക്കാമെന്ന് പറഞ്ഞ് മണിയടിക്കുകയും സിനിമ ചെയ്യാൻ സമ്മതിപ്പിക്കുന്നതുമാണ് വീഡിയോയിലുള്ളത്.
‘എസ് ഐ ആന്റണി ജോസഫ്’… ഇത് കലക്കും ഞങ്ങൾക്ക് കാത്തിരിക്കാൻ വയ്യ നിങ്ങൾക്കോ?’ എന്ന അടിക്കുറിപ്പോടെയാണ് വീഡിയോ പുറത്തുവിട്ടിരിക്കുന്നത്. ചിത്രത്തിന്റെ ട്രെയിലർ പുറത്തുവന്നത് മുതൽ ചർച്ചയായതാണ് ആന്റണി പെരുമ്പാവൂരിന്റെ കഥാപാത്രം. പോലീസായി എത്തുന്ന ആന്റണി പെരുമ്പാവൂരിനെ കണ്ട് ഇയാളിവിടയും വന്നോ എന്ന് മോഹൻലാൽ ചോദിക്കുന്ന രംഗം പ്രേക്ഷകരിൽ ചിരി പടർത്തിയിരുന്നു.
Comments