തിരുവനന്തപുരം: കൊറോണ വ്യാപനം പിടിച്ചുനിർത്താൻ ഏർപ്പെടുത്തിയ ലോക്ഡൗണിന് സമാനമായ നിയന്ത്രണങ്ങൾ നിലവിൽ വരുന്ന ആദ്യ ഞായറാഴ്ചയാണ് നാളെ. 23 നും 30 നുമാണ് ലോക്ഡൗണിന് സമാനമായ നിയന്ത്രണങ്ങൾ ഏർപ്പെടുത്താൻ കൊറോണ അവലോകന യോഗം തീരുമാനിച്ചത്.
ബിവറേജസിന്റെയും കൺസ്യൂമർ ഫെഡിന്റെയും മദ്യവിൽപനശാലകൾ നാളെ തുറക്കില്ല. അതേസമയം കളളുഷാപ്പുകൾ തുറന്ന് പ്രവർത്തിക്കും. ബാറുകളും നാളെയും അടുത്ത ഞയറാഴ്ചയും അടച്ചിടും.
അവശ്യ സർവ്വീസുകൾ മാത്രമാണ് ഞായറാഴ്ച ഉണ്ടാകുക. അതിർത്തിയിലും റോഡുകളിലും പോലീസ് പരിശോധനയും കർശനമാക്കും. ഹോട്ടലുകളിൽ പാഴ്സൽ സർവ്വീസ് മാത്രമാണ് അനുവദിക്കുക. മരണാനന്തര ചടങ്ങുകൾക്കും വിവാഹ ചടങ്ങിനും 20 പേർക്ക് മാത്രമാണ് പങ്കെടുക്കാനാകുക.
കഴിഞ്ഞ ദിവസമാണ് സംസ്ഥാനത്ത് വരുന്ന രണ്ട് ഞായറാഴ്ചകളിൽ ലോക്ഡൗണിന് സമാനമായ നിയന്ത്രണങ്ങൾ ഏർപ്പെടുത്താൻ തീരുമാനിച്ചത്. അനാവശ്യ യാത്രകൾ ഒഴിവാക്കണമെന്നും അധികൃതർ നിർദ്ദേശിച്ചിട്ടുണ്ട്. നിയന്ത്രണങ്ങളുടെ പൂർണമായ ചിത്രം ഇന്ന് വൈകിട്ടോടെയാകും പുറത്തുവരിക.
