പ്രോട്ടോണിന്റെ രുചി…….
പ്രോട്ടോണിന്റെ രുചിയോ? ഇലകട്രോൺ മൈക്രോസ്കോപ്പു കൊണ്ടുപോലും കാണാൻ കഴിയാത്ത പ്രോട്ടോണിനെന്തു രുചി എന്നായിരിക്കും നിങ്ങൾ ചിന്തിക്കുന്നത്. അതിലേക്കു വരുന്നതിനു മുൻപ് നമുക്ക് രുചികളെക്കുറിച്ച് ചെറുതായി ഒന്ന് ചർച്ച ചെയ്യാം.
എല്ലാവർക്കും അറിയുന്നപോലെ നമുക്ക് തിരിച്ചറിയാനാകുന്ന രുചികൾ മധുരം, ഉപ്പ്, ഉമാമി, കയ്പ്പ്, പുളി എന്നിവയാണ്. (എരിവിനെ കൃത്യമായ അർത്ഥത്തിൽ രുചിയായി കൂട്ടാനാകില്ല. അത് രുചി എന്നതിനേക്കാൾ ഒരു ചൂടും, പുകച്ചിലുമാണ് നൽകുന്നത്.) ശരീരത്തിലേക്കു കടക്കുന്ന ശരീരത്തിന് ഉപകാരപ്രദവും, ദോഷകരവുമായ രാസവസ്തുക്കളെ തിരിച്ചറിഞ്ഞ് നമ്മുടെ അതിജീവനത്തി സഹായിക്കുക എന്നതാണ് രുചിയുടെ പരിണാമപരമായ പ്രാധാന്യം. നാവിൽ ഇതിനായി രാസവസ്തുക്കൾ തിരിച്ചറിയാനുള്ള സ്വീകരണികളുണ്ട്. (ശരിക്കു പറഞ്ഞാൽ നാവിൽ മാത്രമല്ല, കുടലിലും, മൂത്രനാളിയിലും വരെ രുചി സ്വീകരണികളുണ്ട്.)
മധുര രസം പഞ്ചസാരയുടെ സാന്നിദ്ധ്യം തിരിച്ചറിയാനുള്ളതാണ്. അതായത് ഊർജ്ജദായകമായ തന്മാത്രകളെ തിരിച്ചറിയാനുള്ള മാർഗ്ഗം. ഇതിന്റെ സാന്നിദ്ധ്യം തിരിച്ചറിഞ്ഞാൽ ആ വസ്തു ആകാവുന്നത്ര അകത്താക്കുക എന്ന നിർദ്ദേശമാണ്‌ തലച്ചോർ പുറപ്പെടുവിക്കുന്നത്. അതുകൊണ്ടാണ് മധുരം കഴിക്കുന്നത് ആസ്വാദ്യമായ അനുഭവമാകുന്നത്.
ഇനി ഉപ്പുരസം. നമ്മുടെ കോശങ്ങളിൽ നടക്കുന്ന പല രാസപ്രവർത്തനങ്ങൾക്കും സോഡിയം ആവശ്യമുണ്ട്. ഉപ്പു രസം ശരിക്കും സോഡിയം അയോണിന്റെ സാന്നിദ്ധ്യമാണ് വിളംബരം ചെയ്യുന്നത്. ഉപ്പുരസം തിരിച്ചറിഞ്ഞ് അത് അകത്താക്കുന്നതിലൂടെ ശരീരത്തിൽ ആവശ്യത്തിന് സോഡിയം ലഭിക്കുന്നുണ്ടെന്ന് ഉറപ്പു വരുത്തുകയാണ് ശരീരം ചെയ്യുന്നത്. നമ്മുടെ നാവിൽ ഉപ്പു രസം തിരിച്ചറിയാനുള്ള സ്വീകരണികളുണ്ട്. ഉപ്പ് ഉമിനീരിൽ ലയിച്ച് പോസറ്റിവ് ചാർജ്ജുള്ള സോഡിയം അയോണും, നെഗറ്റീവ് ചാർജ്ജുള്ള ക്ളോറൈഡ് അയോണുമായി മാറുന്നു. ഈ സോഡിയം അയോണിനെയാണ് നാവിലെ സ്വീകരണി തിരിച്ചറിയുന്നത്. സോഡിയം അയോണിനെപ്പോലെ പൊട്ടാസ്യം അയോണിനെയും നാവിന് തിരിച്ചറിയാനാകും. സോഡിയും ക്ളോറൈഡ് എന്ന കറിയുപ്പിനു സമാനമായ ഉപ്പു രുചിയാണ് പൊട്ടാസ്യം ക്ളോറൈഡ് എന്ന ഇന്തുപ്പിനും.
കൂട്ടത്തിൽ ഒരു ഓഫ് ടോപ്പിക്ക്….. ചിലരൊക്കെ മനുഷ്യന് അറിഞ്ഞുകൂടാത്ത പ്രഹേളിക എന്ന മട്ടിൽ പൊട്ടാസ്യം സയനൈഡിന്റെ രുചി ആർക്കും അറിയില്ല, അതു കണ്ടുപിടിക്കാൻ ശ്രമിച്ചവർ അത് എഴുതിയിടുന്നതിനു മുൻപ് മരിച്ചു പോയി എന്നൊക്കെ തട്ടിവിടാറുണ്ട്. മുകളിൽ എഴുതിയത് മനസ്സിലായവർക്ക് വിഷമായി ഉപയോഗിക്കുന്ന സോഡിയം അല്ലെങ്കിൽ പൊട്ടാസ്യം സയനൈഡിന് ഉപ്പുരസമായിരിക്കും എന്നു മനസ്സിലാക്കാൻ പ്രയാസമില്ല. അതിന് സയനൈഡൊന്നും തിന്നു നോക്കണ്ട. സ്‌കൂളിൽ മര്യാദക്ക് കെമിസ്ട്രി പഠിപ്പിക്കാത്തതുകൊണ്ടാണ് ഈ മാതിരി കഥകൾ ഇങ്ങനെ തലമുറ തലമുറ കൈമാറി പോകുന്നത്.
ഇന് അടുത്ത രുചിയായ ഉമാമി. കോശനിർമ്മാണത്തിന്റെ ഒരു അടിസ്ഥാന നിർമ്മാണ വസ്തുവാണ് പ്രോട്ടീനുകൾ. നമ്മൾ കഴിക്കുന്ന ആഹാരത്തിലെ പ്രോട്ടീന്റെ സാന്നിദ്ധ്യമാണ് ഉമാമി വിളംബരം ചെയ്യുന്നത്. ശരിക്കു പറഞ്ഞാൽ പ്രോട്ടീനിലെ ഗ്ലൂട്ടാമിക് ആസിഡിന്റെ സാന്നിദ്ധ്യം. ഗ്ലൂട്ടാമിക് ആസിഡ് ഒരു അമിനോ ആസിഡാണ്. പ്രോട്ടീനുകൾ ഉണ്ടാക്കപ്പെട്ടിട്ടുള്ളത് അമിനോ ആസിഡുകൾ കൊണ്ടാണ്. അതായത് ഉമാമി രുചി ഉള്ളിടത്ത് ഗ്ലൂട്ടാമിക് ആസിഡ് മാത്രമല്ല, പ്രോട്ടീൻ നിർമ്മാണ വസ്തുക്കളായ മറ്റു അമിനോ ആസിഡുകളുടെയും സാന്നിദ്ധ്യമുണ്ടാകും എന്നു മനസ്സിലാക്കാം.
ഗ്ലൂട്ടാമിക് ആസിഡിന്റെ സോഡിയം ലവണമാണ് മോണോസോഡിയം ഗ്ലുട്ടാമേറ്റ് എന്ന എം.എസ്.ജി. അഥവാ (കുപ്രസിദ്ധമായ) അജിനമോട്ടോ. അജിനമോട്ടോ എന്നു കേൾക്കുമ്പോൾ അസ്ഥാനത്ത് തേളു കുത്തിയപോലെ ചാടുന്ന പ്രകൃതി ഭക്ഷണക്കാരുണ്ട്. പേടിക്കണ്ട, അത്തരം വിഡ്ഢികൾ പറയുന്നത് കണക്കാക്കേണ്ട. അജിനമോട്ടോ വിഷമല്ല. അത് കഴിക്കുന്നതുകൊണ്ട് ആരോഗ്യപ്രശ്‌നങ്ങളൊന്നും ഉണ്ടാകില്ല. അത് സാധാരണ ഉപ്പു പോലെത്തന്നെ ആവശ്യത്തിന് ഭക്ഷണത്തിൽ ഉപയോഗിക്കാവുന്നതാണ്.
കയ്പ്പ് രുചി ശരീരത്തിനു ഹാനികരമായേക്കാവുന്ന പലതരം രാസവസ്തുക്കൾ തിരിച്ചറിയാനുള്ള മാർഗ്ഗമാണ്. ചെടികൾ അവയുടെ സ്വരക്ഷക്കായി നിർമ്മിക്കുന്ന വിഷങ്ങളാണ് ഈ രാസവസ്തുക്കൾ. ഒരു പത്തിരുപത്തഞ്ചു തരത്തിലുള്ള കയ്പ്പു സ്വീകരണികൾ നമ്മുടെ നാക്കിലുണ്ട് എന്നാണ് പറയപ്പെടുന്നത്. ‘അതങ്ങ് തുപ്പിക്കളഞ്ഞേക്ക്,ഇനി മേലാൽ കഴിച്ചേക്കരുത്‌’ എന്നാണ് ഇതിലൂടെ തലച്ചോർ നിർദ്ദേശിക്കുന്നത്.
അമ്ലത്തിന്റെ രുചിയാണ് പുളി രസം. കെമിസ്ട്രി ഭാഷയിൽ പറഞ്ഞാൽ പോസിറ്റീവ് ചാർജ്ജുള്ള ഹൈഡ്രജൻ അയോൺ കൂടുതലുള്ള വസ്തുക്കളാണ് അമ്ലങ്ങൾ. അപ്പോൾ പുളിരസം എന്നാൽ നാക്ക് പോസറ്റിവ് ചാർജ്ജുള്ള ഹൈഡ്രജൻ അയോണുകളെ തിരിച്ചറിയുന്നതാണ്. പഴുത്തു പാകമായ പഴങ്ങളെ തിരിച്ചറിയാനുള്ള മാർഗ്ഗം. ഇതാണ് പുളിരസത്തിന്റെ പരിണാമപരമായ ഉദ്ദേശം.
അപ്പോൾ എന്താണ് ഈ ഹൈഡ്രജൻ അയോൺ? ന്യൂക്ലിയസ്സിനുള്ളിൽ ഒരു പ്രോട്ടോണും, അതിനെ ചുറ്റികൊണ്ട് ഒരൊറ്റ ഇലക്ട്രോണും. ഇതാണ് ഒരു ഹൈഡ്രജൻ ആറ്റം. അത്തരമൊരു ആറ്റത്തിന്റെ ആ ഒരു ഇലക്ട്രോൺ നഷ്ടപ്പെട്ടുപോയാൽ അത് ഹൈഡ്രജൻ അയോണായി. നെഗറ്റീവ് ചാർജ്ജുള്ള ഏക ഇലക്ട്രോൺ നഷ്ടപ്പെട്ടു പോകുന്നതുകൊണ്ട് ഹൈഡ്രജൻ അയോണിന് പോസറ്റിവ് ചാർജ്ജ് കിട്ടുന്നു. ഇനി അതിൽ ബാക്കിയുള്ളത് ഒരു പ്രോട്ടോൺ മാത്രമാണ്. അതായത് ഇങ്ങനെ പോസറ്റിവ് ചാർജ്ജു കിട്ടിയ ഹൈഡ്രജൻ അയോൺ എന്നാൽ ഒരു പ്രോട്ടോൺ എന്നാണർത്ഥം.
പ്രോട്ടോണിന്റെ രുചിയാണ് പുളിരസം. ഒരു പ്രോട്ടോണിനെ രുചിക്കാൻ കഴിയും എന്ന് നിങ്ങൾ സ്വപ്നത്തിൽ പോലും വിചാരിച്ചിട്ടുണ്ടോ? പറഞ്ഞു വരുമ്പോൾ ചെറുനാരങ്ങ കടിക്കുമ്പോൾ നിങ്ങൾ രുചിക്കുന്നത് പ്രോട്ടോണിനെയാണ്.
