ടോംഗ:സുനാമിയെ തുടർന്ന് ദുരിതത്തിലായ ദ്വീപ് രാഷ്ട്രം ടോംഗയ്ക്ക് കൈത്താങ്ങുമായി ഇന്ത്യ.200,000 ഡോളറിന്റെ അടിയന്തര സഹായമാണ് ഇന്ത്യ ടോംഗയ്ക്ക് നൽകുന്നത്. ദുരിതാശ്വാസ,പുനരധിവാസ,പുനനിർമ്മാണ പ്രവർത്തനങ്ങൾക്കായാണ് ഈ പണം ചെലവഴിക്കുക.
ടോംഗയിലുണ്ടായ സുനാമി ജനജീവിതത്തിന് കാര്യമായ തടസ്സം സൃഷ്ടിക്കുകയുണ്ടായി.ഇന്ത്യയുടെ സുഹൃത്ത് എന്ന നിലയിൽ ടോംഗയിലെ ജനങ്ങളെ സഹായിക്കുക ഇന്ത്യയുടെ കടമയാണെന്ന് ഇന്ത്യ പ്രസ്താവനയിൽ വ്യക്തമാക്കി.
സമുദ്രാന്തർഭാഗത്ത് അഗ്നിപർവ്വതം പൊട്ടിത്തെറിച്ചതിനെ തുടർന്നാണ് ടോംഗയിൽ ശക്തമായ സുനാമി ഉണ്ടായത്. തീരപ്രദേശങ്ങളിലെ വീടുകൾക്കും കെട്ടിടങ്ങൾക്കും വൻ നാശനഷ്ടമാണ് സുനാമി ഉണ്ടാക്കിയത്.
ടോംഗയിലെ ഫൊനുവാഫോ ദ്വീപിന് 30 കിലോമീറ്റർ അകലെയുള്ള ഹുംഗടോംഗ ഹാപായ് അഗ്നിപർവ്വതമാണ് കഴിഞ്ഞ ശനിയാഴ്ച പൊട്ടിത്തെറിച്ചത്. മൂന്ന് ദശാബ്ദത്തിനിടെയുണ്ടായ ഏറ്റവും വലിയ സ്ഫോടനമാണ് നടന്നത്.
