മൂന്നും നാലും കുട്ടികൾക്ക് ഒറ്റ പ്രസവത്തിൽ ജന്മം നൽകുകയെന്നത് പുതുമയുള്ള കാര്യമല്ല. ചില സ്ത്രീകൾ അഞ്ച് കുട്ടികൾക്ക് വരെ ഒറ്റപ്രസവത്തിൽ ജന്മം നൽകാറുണ്ട്. വർഷങ്ങളായി വിവിധ ആശുപത്രികളിൽ റിപ്പോർട്ട് ചെയ്ത് കൊണ്ടിരിക്കുന്ന കാര്യമാണിത്. സാധാരണ പ്രസവത്തേക്കാൾ താരതമ്യേന അപൂർവവും അപകടകരവുമായതിനാലാണ് അത്തരം പ്രസവങ്ങൾ ശ്രദ്ധിക്കപ്പെടുന്നത്.
ഇത്തരത്തിൽ മൂന്ന് കുഞ്ഞുങ്ങൾക്ക് ഒറ്റ പ്രസവത്തിൽ ജന്മം നൽകിയ ഒരു അമ്മയുടെ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാണ്. ഏവർക്കും സുപരിചിതമായ സംഭവമായിട്ട് പോലും മൈക്കല മീർ മോഴ്സിയെന്ന സ്ത്രീയും അവരുടെ ചിത്രങ്ങളും വൈറലാകാൻ കാരണമുണ്ട്.
ചാൾസ്, തിയഡോർ, ഗബ്രിയേൽ എന്നീ മൂന്ന് കുഞ്ഞുങ്ങൾക്ക് സിസേറിയനിലൂടെയാണ് മൈക്കല ജന്മം നൽകിയത്. 35 ആഴ്ചകൾ പൂർത്തിയായപ്പോഴായിരുന്നു പ്രസവം. അതായത് എട്ട് മാസങ്ങൾ പിന്നിടുമ്പോഴേക്കും മൈക്കലയ്ക്ക് പ്രസവിക്കേണ്ടി വന്നു. അതുകൊണ്ട് തന്നെ മൈക്കലയുടേത് സാധാരണ പ്രസവത്തേക്കാൾ വേറിട്ടതായി.
ഇതിനിടെ അവളുടെ ഗർഭകാല അവസ്ഥകളും ശരീരത്തിലെ രൂപമാറ്റവും ഫോട്ടോകളായി പകർത്തി ഇൻസ്റ്റഗ്രാമിൽ പോസ്റ്റ് ചെയ്യാനും മൈക്കല മറന്നില്ല. മൂന്ന് കുഞ്ഞുങ്ങളെ വയറിനുള്ളിൽ താങ്ങിനിർത്തുകയെന്നത് അൽപം ശ്രമകരമാണെന്ന് എല്ലാവർക്കും അറിയാമെങ്കിലും അതിനെ തന്മയീ ഭാവത്തോടെ നോക്കികാണാൻ സഹായിക്കുന്ന ചിത്രങ്ങളായിരുന്നു മൈക്കല പോസ്റ്റ് ചെയ്തത്.
ചില ചിത്രങ്ങൾ ഭീതിപ്പെടുത്തുന്നതായിരുന്നു. എന്നാൽ മൈക്കലയുടെ അവസ്ഥയെയും അവൾ കടന്നുപോകുന്ന പങ്കപ്പാടുകളെയും അതേപടി പകർത്തുന്നതായിരുന്നു മറ്റ് പല ചിത്രങ്ങളും. പലരെയും നിശബ്ദരാക്കി കളയുന്ന, എങ്ങനെ പ്രതികരിക്കണമെന്ന് ആലോചിച്ച് കുഴഞ്ഞുപോകുന്ന ചിത്രങ്ങളും മൈക്കല പങ്കുവെച്ചിട്ടുണ്ട്.
ലോകത്ത് ഇതൊക്കെ സർവസാധാരണമായി സംഭവിക്കുന്നതാണെങ്കിലും മൈക്കല പോസ്റ്റ് ചെയ്ത ചിത്രങ്ങൾ ഒരു ഓർമ്മപ്പെടുത്തലായിരുന്നു. അമ്മയാകാനൊരുങ്ങുന്ന ഓരോ സ്ത്രീകളും കടന്നുപോകുന്ന ബുദ്ധിമുട്ടുകളെ ഏറ്റവും ഫലവത്തായി വിശദീകരിക്കുന്നതായിരുന്നു മൈക്കലയുട ചിത്രങ്ങൾ. ഏറ്റവും ഒടുവിൽ അവൾ പോസ്റ്റ് ചെയ്ത ചിത്രം പ്രസവാനന്തരം പകർത്തിയതായിരുന്നു. മൂന്ന് കുഞ്ഞുങ്ങളെ പേറിയ വയർ തൂങ്ങിക്കിടക്കുന്ന ചിത്രമായിരുന്നു അത്.
36 മണിക്കൂർ നീണ്ട ശസ്ത്രക്രിയയ്ക്ക് ഒടുവിലാണ് മൈക്കലയുടെ മൂന്ന് കുഞ്ഞുങ്ങളെ പുറത്തെടുത്തത്. ആദ്യ പ്രസവത്തിൽ ഇരട്ടകുട്ടികളായിരുന്നു മൈക്കലയ്ക്ക്. രണ്ട് പെൺകുട്ടികളായിരുന്നു അത്. ഇരുവരുടെയും മടിയിൽ പുതിയ മൂന്ന് പേരെ കിടത്തിയ ചിത്രവും മൈക്കല ഇൻസ്റ്റഗ്രാമിൽ പങ്കുവെച്ചിട്ടുണ്ട്. ചേച്ചിമാരുടെ മൂന്ന് കുഞ്ഞനിയന്മാർ എന്ന് നിരവധി പേർ കമന്റിലൂടെ പ്രതികരിച്ചു. ഡെൻമാർക്ക് സ്വദേശിയായ മൈക്കലയ്ക്ക് 2,60,000 ഫോളോവേഴ്സാണ് ഇൻസ്റ്റഗ്രാമിലുള്ളത്.
Comments