ന്യൂഡൽഹി: 2022-23 സാമ്പത്തിക വർഷത്തെ ബജറ്റ് അവതരണം പാർലമെന്റിൽ ആരംഭിച്ചു. കേന്ദ്ര ധനമന്ത്രി നിർമ്മല സീതാരാമനാണ് ബജറ്റ് അവതരിപ്പിക്കുന്നത്. കേന്ദ്രമന്ത്രിസഭായോഗത്തിന് ശേഷമാണ് ബജറ്റ് അവതരണം ആരംഭിച്ചിരിക്കുന്നത്. പ്രധാനമന്ത്രി നരേന്ദ്രമോദി, മറ്റ് കേന്ദ്രമന്ത്രിമാർ തുടങ്ങിയവർ പങ്കെടുത്ത കേന്ദ്രമന്ത്രിസഭായോഗം ബജറ്റിന് അംഗീകാരം നൽകിയിരുന്നു. പാർലമെന്റിൽ എത്തുന്നതിന് മുൻപായി രാഷ്ട്രപതി രാംനാഥ് കോവിന്ദിനേയും നിർമ്മല സീതാരാമൻ സന്ദർശിച്ചിരുന്നു.
ടാബ്ലറ്റ് ഉപയോഗിച്ചാകും ബജറ്റ് അവതരിപ്പിക്കുക. കഴിഞ്ഞ വർഷങ്ങളിലും ബജറ്റ് അവതരണം കടലാസ് രഹിതമായിരുന്നു. കൊറോണ പ്രതിസന്ധിക്ക് ശേഷം രാജ്യത്തെ സാമ്പത്തികരംഗത്തെ ഉത്തേജിപ്പിക്കുന്ന പ്രഖ്യാപനങ്ങൾ ബജറ്റിൽ ഉണ്ടാകുമെന്നാണ് വിലയിരുത്തൽ. ജനപ്രിയ പ്രഖ്യാപനങ്ങൾ ഉണ്ടാകുമെന്ന് കേന്ദ്ര ധനസഹമന്ത്രി പങ്കജ് ചൗധരിയും വ്യക്തമാക്കിയിട്ടുണ്ട്.
ബജറ്റിന് മുന്നോടിയായി ഇന്നലെ സാമ്പത്തിക സർവ്വേ ധനമന്ത്രി സഭയിൽ വച്ചിരുന്നു. 2022-23 സാമ്പത്തിക വർഷം മൊത്ത ആഭ്യന്തര ഉത്പാദനത്തിൽ 8-8.5 ശതമാനം വളർച്ച പ്രതീക്ഷിക്കുന്നുവെന്നതാണ് സാമ്പത്തിക സർവ്വേയിലെ പ്രധാന കണ്ടെത്തലുകളിൽ ഒന്ന്. 202223 ലെ യഥാർത്ഥ മൊത്ത ആഭ്യന്ത ഉത്പാദന വളർച്ച യഥാക്രമം 8.7 ശതമാനവും 7.5 ശതമാനവും ആയിരിക്കുമെന്ന ലോകബാങ്കിന്റെയും ഏഷ്യൻ വികസന ബാങ്കിന്റേയും ഏറ്റവും പുതിയ പ്രവചനങ്ങളുമായി ഒത്തുപോകുന്ന കണക്കാണിത്.
