ലക്നൗ: കെജിഎഫ് എന്ന ചിത്രത്തിലൂടെ ഏവരും ഏറ്റെടുത്ത ഒരു ഡയലോഗാണ് ‘പ്രപഞ്ചത്തിൽ അമ്മയേക്കാൾ വലിയ പോരാളി മറ്റാരുമില്ല’ എന്നത്. ഇപ്പോൾ ഈ ഡയലോഗ് യാഥാർത്ഥ്യമാക്കിയിരിക്കുകയാണ് ഉത്തർപ്രദേശുകാരിയായ ഒരമ്മ. സ്വന്തം ജീവൻ പോലും വകവെയ്ക്കാതെ പുള്ളിപ്പുലിയുടെ ആക്രമണത്തിൽ നിന്നും തന്റെ കുഞ്ഞിനെ രക്ഷിച്ചാണ് ഈ അമ്മ കെജിഎഫിലെ ഡയലോഗ് യാഥാർത്ഥ്യമാക്കിയത്.
ഉത്തർപ്രദേശിലെ ബഹ്റൈച്ച് ജില്ലയിലുള്ള ഗിർദ ഗ്രാമത്തിലാണ് സംഭവം. വീട്ടുമുറ്റത്ത് കളിച്ചുകൊണ്ടിരുന്ന കാജൽ എന്ന ആറ് വയസ്സുകാരിയെയാണ് പുള്ളിപ്പുലി ആക്രമിക്കാൻ ശ്രമിച്ചത്. പുലിയെ കണ്ടതും കുഞ്ഞ് നിലവിളിച്ചു. ഇത് കേട്ട അമ്മ റീനാ ദേവി മുറ്റത്തെത്തി കൈയ്യിൽ കിട്ടിയ വടി ഉപയോഗിച്ച പുലിയെ ആക്രമിച്ചു. അടികൊണ്ട് പരിക്കേറ്റ പുലി സ്ഥലത്ത് നിന്നും ഓടി രക്ഷപ്പെട്ടു.
പുലിയുടെ ആക്രമണത്തിൽ കുട്ടിയുടെ മുഖത്തും തലയിലും സാരമായി പരിക്കേറ്റു. കുഞ്ഞിനെ ബഹ്റൈച്ച് ജില്ല ആശുപത്രിയിൽ പ്രവേശിപ്പിച്ചു. വിവരം അറിഞ്ഞ് വനംവകുപ്പ് അധികൃതരും പോലീസും സ്ഥലത്തെത്തി. വിവരം അറിഞ്ഞ വനംവകുപ്പ് ഉദ്യോഗസ്ഥർ അമ്മയെ അഭിനന്ദനങ്ങൾ കൊണ്ട് മൂടുകയായിരുന്നു.
