തിരുവനന്തപുരം : മുഖ്യമന്ത്രിയുടെ ചടങ്ങിലേക്ക് അതിക്രമിച്ച് കടക്കാൻ ശ്രമം. സംഭവത്തിൽ പ്ലാവൂർ സ്വദേശി ബിനുവിനെ പോലീസ് കസ്റ്റഡിയിൽ എടുത്തു. പൂവച്ചൽ സ്‌കൂളിൽ സംഘടിപ്പിച്ച പരിപാടിയ്‌ക്കിടെയായിരുന്നു സംഭവം.
പുതുതായി നിർമ്മിച്ച 53 സ്‌കൂൾ കെട്ടിടങ്ങളുടെ ഉദ്ഘാടന പരിപാടിയാണ് സ്‌കൂളിൽ സംഘടിപ്പിച്ചത്. പരിപാടിയ്‌ക്കെത്തിയ മുഖ്യമന്ത്രി വേദിയിലേക്ക് കയറിയതിന് പിന്നാലെ ബിനുവും അതിക്രമിച്ച് കയറുകയായിരുന്നു.
അപ്രതീക്ഷിതമായി ഒരാൾ വേദിയിലേക്ക് കയറുന്നതു കണ്ട പോലീസുകാർ ബിനുവിനെ തടഞ്ഞു. എന്നാൽ മുഖ്യമന്ത്രിയോട് ചിലത് പറയാനുണ്ടെന്ന് പറഞ്ഞ് ഇയാൾ വീണ്ടും വേദിയിലേക്ക് കയറാൻ ശ്രമിക്കുകയായിരുന്നു. ഇതേ തുടർന്നാണ് ബിനുവിനെ കസ്റ്റഡിയിൽ എടുത്തത്.
മാനസിക വെല്ലുവിളി നേരിടുന്നയാളാണ് ബിനുവെന്നാണ് വിവരം. നിലവിൽ ബിനു പോലീസ് സ്‌റ്റേഷനിലാണ്. വൈദ്യപരിശോധനയുൾപ്പെടെ പൂർത്തിയാക്കിയ ശേഷം ബിനുവിനെതിരെ പോലീസ് തുടർ നടപടികൾ സ്വീകരിക്കും.
Comments