ന്യൂഡൽഹി: ബജാജ് ഗ്രൂപ്പ് മുൻ ചെയർമാൻ രാഹുൽ ബജാജ് അന്തരിച്ചു. 83 വയസായിരുന്നു. ശനിയാഴ്ച ഉച്ചയ്ക്ക് 2.30ഓടെയായിരുന്നു അന്ത്യം.
വാർദ്ധക്യ സഹജമായ അസുഖങ്ങളെ തുടർന്ന് ചികിത്സയിലായിരുന്നു അദ്ദേഹം. കൂടാതെ ഹൃദയ സംബന്ധമായ അസുഖങ്ങളും ന്യുമോണിയയും ബാധിച്ചിരുന്നു. ഒരു മാസം മുമ്പാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. സജീവ ബിസിനസ് പ്രവർത്തനങ്ങളിൽ നിന്നും നേരത്തെ തന്നെ വിരമിച്ചിരുന്നു.
രാജ്യത്തെ പ്രമുഖ വ്യവസായ ഗ്രൂപ്പായ ബജാജിന്റെ തലവനായിരുന്ന അദ്ദേഹത്തിന് പത്മഭൂഷൺ നൽകി 2001ൽ ആദരിച്ചിട്ടുണ്ട്. രാജ്യസഭാംഗമായും പ്രവർത്തിച്ചിരുന്നു. ഇന്ത്യയിലെ ഇരുചക്ര വാഹന വിപണിയെ രാജ്യാന്തര തലത്തിലേക്ക് ഉയർത്തുന്നതിന് വിലപ്പെട്ട സംഭാവനകൾ നൽകിയ വ്യവസായായിരുന്നു അദ്ദേഹം. 40 വർഷത്തോളം ബജാജിന്റെ തലപ്പത്ത് പ്രവർത്തിച്ചു. ബജാജ് ഓട്ടോയുടെ ചെയർമാൻ സ്ഥാനത്ത് നിന്ന് കഴിഞ്ഞ ഏപ്രിലിലാണ് അദ്ദേഹം വിരമിച്ചത്. രാജ്യം ഇതുവരെ കണ്ട ആദരണീയരായ വ്യവസായ പ്രമുഖരിൽ ഒരാളായിരുന്നു രാഹുൽ ബജാജ്.
