നമ്മുടെ വീട്ടിലെ കുട്ടികളെല്ലാം കളിക്കാനായി കളിപ്പാട്ടങ്ങളാണ് ഉപയോഗിക്കാറ്…. എന്നാൽ ഈ ഗ്രാമത്തിലെ കുട്ടികൾ കളിക്കുന്നത് ഉഗ്രവിഷമുള്ള പാമ്പുകൾക്കൊപ്പമാണ്….. മുർഖനും അണലിയും ഇവർക്ക് വെറും കളിക്കോപ്പുകൾ. ഇവിടെ പാമ്പുകൾ മനുഷ്യരുടെ സഹയാത്രികരാണ്. ഒരു ഗ്രാമം എന്നൊക്കെ കേൾക്കുമ്പോൾ നമ്മൾ വിചാരിക്കും ഇത് ലോകത്തിന്റെ ഏതെങ്കിലും ഒരു മൂലയിലുളള പ്രദേശമാണെന്ന്. എന്നാൽ നിങ്ങൾക്ക് തെറ്റി, മഹാരാഷ്‌ട്രയിലെ പൂനയ്‌ക്കടുത്താണ് ഈ ഗ്രാമം സ്ഥിതി ചെയ്യുന്നത്.
ഷോലാപ്പുർ ജില്ലയിലെ ഷെറ്റ്പാൽ എന്ന ഗ്രാമമാണു പാമ്പുകളും ഗ്രാമീണരും തമ്മിലുള്ള ഗാഢ സ്നേഹത്തിലൂടെ ലോകശ്രദ്ധ നേടിയത്. സർപ്പങ്ങളെ ആരാധിക്കുന്നവരാണ് ഈ ഗ്രാമവാസികൾ. പാമ്പുകളുമൊത്ത് കളിക്കാനും അവരുമായി കൂട്ടുകൂടാനും ചെറിയ പ്രായത്തിൽ തന്നെ ഇവിടുത്തുകാരെ പരിശീലിപ്പിക്കുന്നു. എല്ലാ വീടുകളിലും മൂർഖൻ പാമ്പുകൾക്ക് വിശ്രമിക്കാനായി വീടിനുള്ളിൽ തന്നെ പ്രത്യേകയിടം ഷെറ്റ്പാലിൽ ഒരുക്കാറുണ്ട്. പുതുതായി വീട് വയ്‌ക്കുന്നവരും വീടിനുള്ളിൽ ഇത് പണിയും.
ഗ്രാമത്തിലെ സ്‌കൂളുകളിലും മാർക്കറ്റുകളിലും മൂർഖന്മാർ അലഞ്ഞ് തിരിഞ്ഞ് നടക്കുക പതിവാണ്. പാമ്പുകളോടൊപ്പം വളരുന്നതിനാൽ കുട്ടികൾക്കും ഇവയെ പേടിയില്ല.
പാമ്പ് സ്‌നേഹം കൊണ്ട് പ്രശസ്തി നേടിയ ഷെറ്റ്പാലിൽ വെറും 2600 ആളുകൾ മാത്രം താമസിക്കുന്നത്. വരണ്ട സമതല പ്രദേശത്തു സ്ഥിതി ചെയ്യുന്നതിനാലാണു ഷെറ്റ്പാലിൽ ഇത്രത്തോളം പാമ്പുകൾ. നേരത്തെ സമീപ പ്രദേശങ്ങളിൽ പാമ്പുകടിയേറ്റവരെ ചികിത്സിക്കാനായി ഇവിടെയെത്തിച്ചിരുന്നതായി നാട്ടുകാർ പറയുന്നു. എന്നാൽ ഇത്രയധികം പാമ്പുകൾ ഇവിടെ ഉണ്ടായിട്ടും ഷെറ്റ്പാൽ ഗ്രാമത്തിൽ ആർക്കും പാമ്പുകടിയേറ്റിട്ടില്ലെന്നാണ് നാട്ടുകാർ അവകാശപ്പെടുന്നത്.
ഞങ്ങൾ എത്രത്തോളം പാമ്പുകളെ സ്‌നേഹിക്കുകയും ബഹുമാനിക്കുകയും ചെയ്യുന്നോ അതിനേക്കാൾ ഉപരി അവ ഞങ്ങളെ സ്‌നേഹിക്കുന്നുണ്ടെന്ന് പ്രദേശവാസികൾ പറയുന്നു. എന്തായാലും ഈ അത്ഭുത ഗ്രാമം കാണാൻ വിദേശത്ത് നിന്ന് വരെ ആളുകൾ പറന്നെത്താറുണ്ട്. പാമ്പുകളെ പേടിക്കുന്നവർക്ക് ഒരു പുതിയ അനുഭവമായിരിക്കും ഈ ഗ്രാമം
