ദോശ…അതും നല്ല ചൂടുള്ള മസാല ദോശ കഴിക്കാൻ ആഗ്രഹമുണ്ടോ ? ഇത് വെറും ദോശയല്ല… വേറെ ലെവൽ ദോശയാണ്…. ഈ ദോശ കഴിച്ചാൽ ഹോട്ടൽ ഉടമ നിങ്ങൾക്ക് കാശു ഇങ്ങോട്ട് തരും.. കുറച്ചൊന്നുമല്ല, 71,000 രൂപ ….കൊള്ളാല്ലോ കളി, ഭക്ഷണവും കഴിക്കാം കാശും കിട്ടും…. എവിടെയാണിത് എന്നാണോ നിങ്ങൾ ഇപ്പോൾ ചിന്തിക്കുന്നത്. ഈ അവസരം ലഭ്യമാകണമെങ്കിൽ നേരെ വെച്ച് പിടിക്കേണ്ടത് അങ്ങ് നമ്മുടെ രാജ്യ തലസ്ഥാനമായ ഡൽഹിയിലേയ്ക്കാണ്……
ഉത്തംനഗറിലെ സ്വാമി ശക്തി സാഗറെന്ന ഹോട്ടലിന്റെ ഉടമയാണ് ദോശ തിന്നാൽ കാശ് കൊടുക്കുന്ന പരിപാടിയുമായി രംഗത്തുള്ളത്. സാമൂഹമാധ്യമങ്ങളിലൂടെ ഇപ്പോൾ വൈറലായിരിക്കുകയാണ് ശക്തി സാഗറിലെ ഈ ദോശ.. വെറും ഒരു മസാല ദോശ തിന്നാൽ ഇത്രയും അധികം പണം നൽകുന്ന പരിപാടിയിൽ എന്തെങ്കിലും ഒരു ഉടായിപ്പ് കാണുമല്ലോ എന്നാണോ നിങ്ങൾ ചിന്തിക്കുന്നത്. അതിനുത്തരമാണ് ഇനി പറയുന്നത്. ദോശയുടെ വലുപ്പം തന്നെയാണ് ഏറ്റവും വലിയ ഹൈലൈറ്റ്. ഒന്നും രണ്ടും അല്ല പത്ത് അടി വലുപ്പമാണ് ഈ മസാല ദോശയ്ക്കുള്ളത്. സാധാരണ മസാല ദോശ ഉണ്ടാക്കുന്ന രീതിയിൽ തന്നെയാണ് ഈ വെറൈറ്റി ദോശയും തയ്യാറാക്കുന്നത്.
നല്ല പോലെ ചൂടായ ദോശ കല്ലിൽ അടുത്തടുത്തായി ദോശമാവ് ഒഴിക്കുന്നു. പിന്നീട് ഈ ദോശകൾ തമ്മിൽ മാവ് ചേർത്ത് ബന്ധിപ്പിക്കുന്നു. ഇതിലേയ്ക്ക് നെയ്യ് ഒഴിച്ച ശേഷം തയ്യാറാക്കി വെച്ച ഉരുളക്കിഴങ്ങ് മസാല നീളത്തിൽ വെച്ച് ദോശ ചുരുട്ടിയെടുക്കുന്നു. ചുരുട്ടിയെടുത്ത ഈ ഭീമൻ മസാല ദോശയുടെ മുകളിൽ ചീസ് ചിരകിയിട്ടാണ് ഗാർണിഷ് ചെയ്യുന്നത്. ദോശ വിളമ്പുന്ന രീതിയും വളരെ മനോഹരമാണ്. സാമ്പാർ, വിവിധ തരം ചട്നികൾ, ഉരുളക്കിഴങ്ങ് മസാല എന്നിവയ്ക്കൊപ്പമാണ് ദോശ വിളമ്പുന്നത്.
രുചികരമായ ഈ ഭീമൻ മസാല ദോശ നിശ്ചിത സമയത്തിനുള്ളിൽ ഒരാൾ കഴിച്ച് തീർത്താലാണ് ഹോട്ടൽ 71,000 രൂപ നൽകുക. അല്ലാത്ത പക്ഷം ദോശയുടെ വിലയായ 1,500 രൂപ ഭക്ഷണം കഴിച്ചയാൾ തിരികെ നൽകണം. കേൾക്കുമ്പോൾ ഈ ചലഞ്ച് എന്ത് എളുപ്പമാണെന്ന് കരുതല്ലേ. ഇത് സിംപിളായി കഴിച്ച് തീർക്കാനാകും എന്ന് ചിന്തിച്ച് പലരും ഭീമൻ ദോശ കഴിച്ച് തീർക്കാൻ ശ്രമിച്ചേങ്കിലും ഇതുവരെ ആർക്കും വിജയിക്കാനായില്ലെന്ന് ഹോട്ടൽ ഉടമ പറയുന്നു. നിരവധി ആളുകൾ ഈ ദോശ രുചിച്ച് നോക്കിയെങ്കിലും ആർക്കും തന്നെ ഇത് മുഴുവൻ കഴിച്ച് തീർക്കാൻ സാധിച്ചില്ല.
സമൂഹമാദ്ധ്യമങ്ങളിൽ വൈറലായ ഭീമൻ മസാല ദോശയുടെ ദൃശ്യങ്ങൾ കണ്ട് ആളുകൾ ഒന്ന് ഞെട്ടി. ഇതിനോടകം 40 ലക്ഷത്തിലധികം ആളുകൾ സമൂഹമാദ്ധ്യമങ്ങളിൽ ദോശയുടെ ദൃശ്യങ്ങൾ കണ്ടുകഴിഞ്ഞു. ഇത് കഴിച്ച് തീർക്കുന്നത് വളരെ നിസ്സാരം എന്ന് കരുതി പോയവർ ദോശ പകുതി പോലും കഴിക്കാൻ സാധിക്കാതെ തോറ്റുമടങ്ങി.
എന്തായാലും നാവിൽ വെള്ളമൂറുന്ന ഈ ദോശ കഴിക്കാൻ താൽപര്യമുള്ളർ ഡൽഹിയിലേയ്ക്ക് ചെന്നോളൂ….പത്ത് അടി നീളമുള്ള ഈ ഭീമനെ കഴിച്ച് തീർത്താൽ കൈ നിറയെ പണവുമായി തിരികെ എത്താം …. പല വമ്പൻമാർക്കും അടിതെറ്റിയ ദോശ ചാലഞ്ച് ഏറ്റെടുക്കാൻ ഇന്നു തന്നെ പുറപ്പെട്ടോളു നിങ്ങളുടെ ശക്തി തെളിയിക്കാൻ ശക്തി സാഗറിലേയ്ക്ക്…
Comments