തിരുവനന്തപുരം: വൈദ്യുതി ബോർഡിന്റെ ഔദ്യോഗിക ഫേസ്ബുക്ക് പേജിൽ, ബോർഡിനെ കുറിച്ചും ജീവനക്കാരെ കുറിച്ചുമുള്ള ചെയർമാൻ ബി. അശോകിന്റെ വിവാദ കുറിപ്പ് പിൻവലിച്ചു. കഴിഞ്ഞ സിപിഎം ഭരണകാലത്ത് ബോർഡിൽ നടന്ന ക്രമക്കേടുകളെ കുറിച്ച് സൂചിപ്പിച്ചുകൊണ്ടുള്ളതായിരുന്നു ചെയർമാന്റെ പോസ്റ്റ്. കൂടാതെ, ബോർഡിലെ ജീവനക്കാരുടെ സംഘടനകൾക്കതിരായ ചില ആരോപണങ്ങളും കുറിപ്പിലുണ്ടായിരുന്നു.
ഉന്നയിച്ച വിഷയങ്ങൾ ചർച്ചയിലൂടെ പരിഹരിച്ചു. തിരക്കിൽ തയ്യാറാക്കിയ പോസ്റ്റായിരുന്നു അത്. അതിനാൽ ഫെബ്രുവരി 14ലെ തന്റെ ഫേസ്ബുക്ക് പ്രതികരണം പിൻവലിക്കുന്നു എന്ന് അശോക് വ്യക്തമാക്കി. വൈദ്യുതി ബോർഡിന്റെ ഫേസ്ബുക്കിലൂടെ തന്നെയാണ് അദ്ദേഹം ഇക്കാര്യം വ്യക്തമാക്കിയത്.
വൈദ്യുതി ബോർഡ് ചെയർമാനുമായി ഉദ്യോഗസ്ഥരും സംഘടനകളും ചർച്ച നടത്തിയിരുന്നു. അതിൽ ഫേസ്ബുക്ക് പോസ്റ്റിനെ കുറിച്ചുള്ള വിവാദം ശക്തമായിരുന്നു. തുടർന്ന് ചർച്ചയ്‌ക്ക് ശേഷം പോസ്റ്റ് പിൻവലിക്കുമെന്ന് ചെയർമാൻ ഉറപ്പ് നൽകിയിരുന്നു.
