കൊച്ചി : സിപിഎം പ്രവർത്തകർ മർദ്ദിച്ചുകൊന്ന ട്വന്റി ട്വന്റി പ്രവർത്തകൻ ദീപുവിന്റെ സംസ്കാര ചടങ്ങിൽ പങ്കെടുത്തവർക്കെതിരെ കേസ് എടുത്തത്തിൽ സർക്കാരിനെയും പോലീസിനെയും രൂക്ഷമായി വിമർശിച്ച് കോർഡിനേറ്റർ സാബു എം ജേക്കബ്. കേരളത്തിൽ ഭരിക്കുന്ന പാർട്ടിയ്ക്ക് ഒരു നിയമവും, മറ്റുള്ളവർക്ക് മറ്റൊരു നിയമവുമാണെന്നും സാബു കുറ്റപ്പെടുത്തി. കേസ് രജിസ്റ്റർ ചെയ്തതിന് പിന്നാലെ മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം.
സംസ്കാര ചടങ്ങിൽ പ്രതിപക്ഷ നേതാവ് വി.ഡി സതീശനും പങ്കെടുത്തിരുന്നു. എന്തുകൊണ്ടാണ് അദ്ദേഹത്തിനെതിരെ കേസ് എടുക്കാത്തത്. പോലീസിന്റെ അനുമതി വാങ്ങിയ ശേഷമാണ് മൃതദേഹം പൊതുദർശനത്തിന് വച്ചതും സംസ്കാര ചടങ്ങുകൾ നടത്തിയതും. കണ്ടാൽ അറിയാവുന്ന ആയിരത്തോളം പേർക്കെതിരെയാണ് കേസ് എടുത്തിരിക്കുന്നത്. വി.ഡി സതീശൻ കണ്ടാൽ അറിയാവുന്ന പ്രതിയല്ലേ?. എന്തുകൊണ്ട് അദ്ദേഹത്തിനെതിരെ കേസ് എടുത്തില്ല. മുൻ എംഎൽഎ സജീന്ദ്രൻ ചടങ്ങിൽ പങ്കെടുത്തിരുന്നു. എന്തുകൊണ്ട് അദ്ദേഹം പ്രതിയായില്ലെന്നും അദ്ദേഹം ചോദിച്ചു.
ഇവിടെ ഒരു കൂട്ടർക്ക് ഒരു നിയമവും മറ്റേ കൂട്ടർക്ക് മറ്റൊരു നിയമവുമാണ്. ഭരിക്കുന്ന പാർട്ടിയ്ക്കും, അവരുടെ എംഎൽഎമാർക്കും, മന്ത്രിമാർക്കും ഒരു നിയമമാണെന്നും അദ്ദേഹം കുറ്റപ്പെടുത്തി.
