തിരുവനന്തപുരം : ഗവർണറെ പുറത്താക്കാൻ സംസ്ഥാനങ്ങൾക്ക് അനുമതി നൽകണമെന്ന് കേന്ദ്രത്തോട് ആവശ്യപ്പെട്ട് സംസ്ഥാന സർക്കാർ. പൂഞ്ചി കമ്മീഷൻ റിപ്പോർട്ടിന്മേൽ നൽകിയ ശുപാർശയിലാണ് ഈ ആവശ്യം ഉള്ളത്. നിലവിൽ സംസ്ഥാനത്ത് സർക്കാരും ഗവർണറും തമ്മിലുള്ള ഭിന്നതകൾ രൂക്ഷമായി തന്നെ തുടരുകയാണ്. ഇതിനിടെയാണ് ഗവർണർക്കെതിരായ സർക്കാരിന്റെ പടയൊരുക്കം.
ഗവർണർമാരെ പുറത്താക്കാൻ സംസ്ഥാനങ്ങൾക്ക് അധികാരം വേണം. ഭരണഘടനാ ലംഘനം, ചാൻസിലർ പദവിയിൽ വീഴ്ച, ക്രിമിനൽ പ്രോസിക്യൂഷൻ നടപടികളിൽ വീഴ്ച എന്നിവയുണ്ടായാൽ ഗവർണറെ പുറത്താക്കാൻ സംസ്ഥാനങ്ങൾക്ക് അനുമതി നൽകണം. ഇതിനായി നിയമസഭയ്ക്ക് അനുമതി നൽകണമെന്നും സംസ്ഥാന സർക്കാർ നൽകിയ മറുപടിയിൽ വ്യക്തമാക്കുന്നു. ഗവർണറെ പുറത്താക്കാൻ നിയമസഭയ്ക്ക് അധികാരം നൽകണമെന്ന ആവശ്യം നേരത്തെ മന്ത്രിസഭ അംഗീകരിച്ചിരുന്നു.
നിലവിൽ ഗവർണറെ പുറത്താക്കുന്നതുമായി ബന്ധപ്പെട്ട് വ്യക്തതയില്ലെന്നും സർക്കാർ മറുപടിയിൽ ചൂണ്ടിക്കാട്ടുന്നുണ്ട്.
