കീവ്: അവസാന നിമിഷം വരെ പോരാടാൻ ഉറച്ച് യുക്രെയ്ൻ. തലസ്ഥാന നഗരമടക്കം റഷ്യൻ പടയാളികൾ വളയുമ്പോഴും രാജ്യത്തിന് വേണ്ടി യുദ്ധം ചെയ്യാനാണ് യുക്രെയ്ൻ പൗരൻമാരോട് ആഹ്വാനം ചെയ്യുന്നത്. സ്വതന്ത്ര്യം അടിയറവ് വെയ്‌ക്കാതെ രാജ്യത്തിനായി യുദ്ധം ചെയ്യാൻ പ്രായം നോക്കേണ്ടതില്ല എന്നാണ് യുക്രെയ്ൻ പറയുന്നത്.
പ്രായപൂർത്തിയാകാത്തവർക്കും സൈന്യത്തിന്റെ ഭാഗമാകാമെന്നാണ് യുക്രെയ്ൻ പ്രതിരോധമന്ത്രാലയം അറിയിച്ചിരിക്കുന്നത്. ഇതിനായുള്ള നടപടി ക്രമങ്ങൾ ലളിതമാക്കിയെന്നും പാസ്‌പോർട്ടോ മറ്റ് ഐഡെന്റിറ്റി കാർഡോ മാത്രം മതിയാവുമെന്ന് യുക്രെയ്ൻ പ്രതിരോധ മന്ത്രാലയം വ്യക്തമാക്കി.
നടപടി ക്രമങ്ങളിൽ എന്തെങ്കിലും തടസ്സം നേരിടുകയാണെങ്കിൽ അധികൃതരമായി ബന്ധപ്പെട്ടാൽ മതിയാവുമെന്ന് പ്രതിരോധ മന്ത്രാലയം അറിയിച്ചിട്ടുണ്ട്. പ്രതിരോധ മന്ത്രാലയത്തിന്റെ ട്വിറ്റർ അക്കൗണ്ടിലൂടെയാണ് പ്രതിരോധമന്ത്രാലയം ഇത് സംബന്ധിച്ച വിവരങ്ങൾ പുറത്ത് വിട്ടത്.
കഴിഞ്ഞ ദിവസം ആയുധങ്ങൾ കൈവശമുള്ള എല്ലാവരും യുദ്ധത്തിൽ അണി നിരക്കണമെന്നും ആയുധം കൈവശമില്ലാത്ത എന്നാൽ യുദ്ധം ചെയ്യാൻ ആഗ്രഹിക്കുന്ന പൗരന്മാർക്ക് ആയുധം നൽകുമെന്നും യുക്രെയ്ൻ പ്രഖ്യാപിച്ചിരുന്നു.
Comments