പ്രകൃതി ക്ഷോഭത്തിൽ വീട് നഷ്ടമായ വിധവയോട് നഷ്ടപരിഹാരം നൽകാൻ കൈക്കൂലി ആവശ്യപ്പെട്ടു; തഹസിൽദാർക്കെതിരെ നടപടിയെടുത്ത് ലോകായുക്ത

തിരുവനന്തപുരം; പ്രകൃതി ക്ഷോഭത്തിൽ വീട് നഷ്ടപ്പെട്ട വിധവയോട് നഷ്ടപരിഹാരം ലഭ്യമാക്കാൻ കൈക്കൂലി ചോദിച്ചെന്ന പരാതിയിൽ നടപടിയെടുത്ത് ലോകായുക്ത. സ്ത്രീയോട് കൈക്കൂലി ചോദിച്ച തഹസിൽദാർക്കെതിരെയാണ് നടപടി. സ്ത്രീയ്‌ക്ക് നഷ്ടപരിഹാരമായി 50,000 രൂപയും പലിശയും നൽകാൻ റവന്യൂ സെക്രട്ടറിയോട്് ലോകായുക്ത ഉത്തരവിട്ടു.

നെടുമങ്ങാട് വെള്ളനാട് വില്ലേജിൽ പുതുക്കുളങ്ങര വിളയിൽ വീട്ടിൽ ഓമനയാണ് പരാതിക്കാരി. 2014 മെയിൽ പ്രകൃതിക്ഷോഭത്തിൽ വീട് ഭാഗികമായി തകർന്നിരുന്നു.സ്ഥലം സന്ദർശിച്ച വില്ലേജ് ഓഫീസർ 15,000 രൂപ നഷ്ടപരിഹാരം നിശ്ചയിച്ച് കാട്ടാക്കട തഹസിൽദാർക്ക് റിപ്പോർട്ട് സമർപ്പിച്ചു.

തുടർന്ന സ്ഥലം പരിശോധിച്ച ഡെപ്യൂട്ടി തഹസിൽദാർ തുക 3000 രൂപയായി കുറച്ചു. ഇതിന് പിന്നാലെ കൈക്കൂലി നൽകാൻ തയ്യാറാകാത്തതിനാലാണ് നഷ്ടപരിഹാരതുക കുറച്ചതെന്ന് ആരോപിച്ച് പരാതിക്കാരി ലോകായുക്തയിൽ കേസ് ഫയൽ ചെയ്യുകയായിരുന്നു.3 മാസത്തിന് ശേഷം വീട് പൂർണ്ണമായും തകർന്നു.

പിന്നീട് ഒരു ചെറിയ ഓല ഷെഡിലാണ് പരാതിക്കാരിയും അമ്മയും താമസിച്ചതെന്നാണ് റിപ്പോർട്ട്. തുടർന്ന് അന്വേഷണം നടത്തിയ ലോകായുക്ത പരാതി ന്യായമാണെന്ന് കണ്ടെത്തുകയായിരുന്നു.

തഹസീൽദാറുടെയും വില്ലേജ് ഓഫീസറുടെയും മനോഭാവത്തെ രൂക്ഷമായി വിമർശിച്ച ലോകായുക്ത പരാതിക്കാരിക്ക് 50,000 രൂപയും പലിശയും നല്കുവാൻ റവന്യു സെക്രട്ടറിക്ക് നിർദ്ദേശം നൽകുകയായിരുന്നു.6 ശതമാനം പലിശ 2017 നവംബർ മുതലുള്ളത് നൽകുവാനാണ് നിർദ്ദേശം. തുക രണ്ട് മാസത്തിനുള്ളിൽ നൽകിയില്ലെങ്കിൽ 9 ശതമാനം പലിശ നൽകണമെന്നും ഉത്തരവിൽ വ്യക്തമാക്കുന്നു