ലക്‌നൗ: റഷ്യൻ അധിനിവേശത്തിന് പിന്നാലെ യുക്രെയ്‌നിൽ നിന്നും തിരിച്ചെത്തിയ വിദ്യാർത്ഥികളുമായി സംവദിച്ച് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ഒപ്പറേഷൻ ഗംഗയുടെ ഭാഗമായി ഒഴിപ്പിച്ച അൻപതിലധികം വിദ്യാർത്ഥികളോടാണ് അദ്ദേഹം സംസാരിച്ചത്. യുക്രെയ്‌നിലെ സാചര്യങ്ങളും അനുഭവങ്ങളും മുഖ്യമന്ത്രിയോട് കുട്ടികൾ വിശദീകരിച്ചു.
വിദ്യാർത്ഥികളുടെ പ്രശ്‌നങ്ങൾ ശ്രദ്ധേയോടെ കേട്ട യോഗി ആദിത്യനാഥ് യുപിയിൽ 33 പുതിയ മെഡിക്കൽ കോളേജുകളും രണ്ട് പുതിയ എയിംസ് ഹോസ്പിറ്റലും സ്ഥാപിച്ചതായി പറഞ്ഞു. കൂടാതെ അടുത്ത ഒരുവർഷത്തോടെ സംസ്ഥാനത്തെ എല്ലാ ജില്ലകളിലും ഒരു മെഡിക്കൽ കോളേജ് സ്ഥാപിക്കുമെന്നും യോഗി ആദിത്യാനാഥ് വ്യക്തമാക്കി.
അതേസമയം യുക്രെയ്ൻ ഒഴിപ്പിക്കൽ സംബന്ധിച്ച് എല്ലാ ദിവസവും പ്രധാനമന്ത്രി ഉന്നതതല യോഗം ചേരുന്നുണ്ട്. വിദേശകാര്യ മന്ത്രാലയത്തിന്റെ കണക്കുകൾ പ്രകാരം ഇതുവരെ 13,300 വിദ്യാർത്ഥികളെ യുക്രെയ്‌നിൽ നിന്നും ഇന്ത്യയിലെത്തിച്ചിട്ടുണ്ട്. യുക്രെയ്‌നിലെ രണ്ടാമത്തെ വലിയ നഗരമായ ഖാർകീവ് അടക്കമുള്ള പ്രദേശത്ത് നിന്നും മുഴുവൻ ഇന്ത്യക്കാരേയും ഒഴിപ്പിച്ചിട്ടുണ്ടെന്നും വിദേശകാര്യമന്ത്രാലയം ഇന്നലെ അറിയിച്ചിരുന്നു.
