ന്യൂഡൽഹി : അഞ്ച് സംസ്ഥാനങ്ങളിൽ നടന്ന തെരഞ്ഞെടുപ്പിൽ നാലിടത്തും ബിജെപി വെന്നിക്കൊടി പാറിച്ചതിന് പിന്നാലെ പ്രതികരണവുമായി ഭാരതീയ കിസാൻ യൂണിയൻ വക്താവ് രാകേഷ് ടിക്കായത്. തങ്ങൾ രാഷ്ട്രീയക്കാരല്ല, പ്രതിഷേധക്കാരാണെന്നാണ് ടിക്കായത് പറഞ്ഞത്.
‘ബിജെപി വിജയിച്ചാൽ എനിക്ക് ഒരു പ്രശ്നവുമില്ല. അത് ഭാരതീയ കിസാൻ യൂണിയനെ ബാധിക്കില്ല. കാരണം ഞങ്ങൾ രാഷ്ട്രീയക്കാരല്ല, ആക്ടിവിസ്റ്റുകളാണ്.’ടിക്കായത് പറഞ്ഞു.
കാർഷിക നിയമങ്ങൾക്കെതിരെ മുന്നിൽ നിന്ന് സമരം നയിച്ച നേതാവാണ് രാകേഷ് ടിക്കായത്. അന്ന് മുതൽ മോദി സർക്കാരിനെ താഴെയിറക്കും എന്ന വീരവാദം മുഴക്കിക്കൊണ്ടാണ് ടിക്കായത് നടന്നിരുന്നത്. തെരഞ്ഞെടുപ്പ് സമയത്തും ബിജെപിക്കെതിരെ നിരവധി വ്യാജ പ്രചാരണങ്ങൾ നടത്തിയിരുന്നു. തുടർന്ന് വോട്ടെണ്ണൽ അടുത്തപ്പോൾ വോട്ടിംഗ് മെഷീനിൽ ബിജെപി അട്ടിമറി നടത്താൻ സാദ്ധ്യതയുണ്ടെന്നും പറഞ്ഞു പരത്തി.
എന്നാൽ ഇത്തരം പ്രചാരണത്തിനൊന്നും തന്നെ ബിജെപിയെ പരാജയപ്പെടുത്താനായില്ല. ഈ സാഹചര്യത്തിലാണ് ടിക്കായത് കളം മാറ്റി ചവിട്ടുന്നത്. ബിജെപി ജയിച്ചാൽ തങ്ങൾക്ക് ഒന്നുമില്ല എന്നാണ് ടിക്കായത് പറയുന്നത്.
