സാധാരണ 40-ാം വയസ്സിൽ മരണം; എന്നാൽ 70-ാം വയസ്സിലും അമ്മയായി ലോകത്തിലെ ഏറ്റവും പ്രായമേറിയ കടൽ പക്ഷി

സാധാരണ നിലയിൽ 40 വർഷം മാത്രം ആയുസ്സുള്ള കടൽപക്ഷിയാണ് ആൽബട്രോസ്…. എന്നാൽ 70 വർഷത്തോളം ജീവിക്കുകയും 40 തോളം കുഞ്ഞുങ്ങളുടെ അമ്മയുമാണ് ആൽബട്രോസുകളിലെ മുത്തശ്ശിയായ വിസ്ഡം. ഏറ്റവും അവസാനം തന്റെ 70 -ാം വയസ്സിലും കുഞ്ഞിന് ജന്മം നൽകി ജന്തുശാസ്ത്ര ലോകത്തെ ഞെട്ടിച്ചിരിക്കുകയാണ് വിസ്ഡം.
ലോകത്തിലെ ഏറ്റവും പ്രായമേറിയ കടൽപ്പക്ഷിയെന്നാണ് വിസ്ഡത്തെ വിശേഷിപ്പിക്കുന്നത്.. 70-ാം വയസ്സിലും അമ്മയായതോടെയാണ് ഈ പക്ഷി വാർത്തകളിൽ ഇടം പിടിച്ചത്…. പുതുതായി മുട്ട വിരിഞ്ഞുണ്ടായത് ഈ പക്ഷിയുടെ നാൽപതാമത്തെ കുഞ്ഞാണ്. ഹവായിക്ക് സമീപമുള്ള മിഡ്വേ അറ്റോൾ എന്ന ദ്വീപിലെ സംരക്ഷണ കേന്ദ്രത്തിലാണ് വിസ്ഡം കഴിയുന്നത്….

1956 ലാണ് അമേരിക്കയിലെ ശാസ്ത്രജ്ഞർ ഈ ആൽബട്രോസ് പക്ഷിയെ കണ്ടെത്തിയത്. ആൽബട്രോസ് പക്ഷികളാണ് കടൽപക്ഷികളിൽ വെച്ച് ഏറ്റവും വലുത്. അഞ്ച് വയസ്സ് മാത്രമായിരുന്നു ശാസ്ത്രജ്ഞർ കണ്ടെത്തുമ്പോൾ പക്ഷിയുടെ പ്രായം. അവർ വിസ്ഡം എന്ന പേരും പക്ഷിയ്‌ക്ക് നൽകി. ആൽബട്രോസ് പക്ഷികൾക്ക് ഒറ്റ ഇണ മാത്രമാണ് സാധാരണ ഉണ്ടാവുക. വിസ്ഡത്തിന് 2010-ൽ അകികാമെയ് എന്ന ഒരു ആൺ ആൽബട്രോസും കൂട്ടായി വന്നു. 40 വയസ്സ് വരെമാത്രമാണ് പൊതുവെ ആൽബട്രോസ് പക്ഷികൾ ജീവിയ്‌ക്കുന്നത്. പക്ഷേ നാൽപ്പതും കഴിഞ്ഞ് എഴുപതിൽ എത്തിനിൽക്കുകയാണ് വിസ്ഡവും ഇണയും.

കഥകളിലും നോവലുകളിലും ആൽബട്രോസ് പക്ഷികൾ ഇടം നേടിയിട്ടുണ്ട്. ആൽബട്രോസ് പക്ഷികളുടെ ഉപവിഭാഗമായ ലെയ്സാൻ എന്ന ഗണത്തിൽപ്പെടുന്ന കടൽ പക്ഷിയാണ് വിസ്ഡം. വടക്കൻ ശാന്ത സമുദ്രമേഖലയിൽ സാധാരണ കണ്ടുവരാറുള്ള ആൽബട്രോസുകൾ ഒരു വർഷത്തിൽ ഒരു മുട്ടയാണ് ഇടുന്നത്. ചെറുദ്വീപുകളിലും പാറക്കെട്ടുകളിലുമാണ് ഇവ കൂടുകെട്ടുന്നത്. ഒരു മുട്ട വിരിയാൻ ഏകദേശം എട്ട് ആഴ്ച വേണം. കുഞ്ഞുങ്ങൾ പൂർണവളർച്ചയെത്തുന്നത് 10 മാസങ്ങൾക്കു ശേഷമാണ്.

നാവികരുടെ ഇടയിൽ ഇവയെപ്പറ്റി അന്ധവിശ്വാസങ്ങൾ നിറഞ്ഞ ധാരാളം കഥകൾ നിലവിലുണ്ട്. ആൽബട്രോസ് കപ്പലിനെ പിന്തുടരുന്നത് ശുഭസൂചകമാണെന്നും അതിനെ ഉപദ്രവിച്ചാൽ തങ്ങൾക്കു ദുര്യോഗമുണ്ടാകുമെന്നും സമുദ്രസഞ്ചാരികൾ വിശ്വസിക്കുന്നു. മുൻ കാലങ്ങളിൽ സമുദ്രത്തിൽ നിന്നും മരിച്ച നാവികരാണ് ആൻബട്രോസായി പുൻജനിക്കുന്നതെന്ന് അന്തവിശ്വാസവും നിലനിന്നിരുന്നു. അതിനാൽ ആരും തന്നെ ഇവയെ ഉപദ്രവിക്കാറുമില്ല. നിരവധി പ്രത്യേകതകളുള്ള പക്ഷിയാണ് ആൽബട്രോസ് .നിലത്തിറങ്ങാതെ പതിനായിരത്തിലധികം കിലോമീറ്ററുകൾ സഞ്ചരിക്കാൻ ഇവയ്‌ക്കാകും. പത്ത് കിലോയിലധികം ഭാരമുള്ള ഈ ഇനത്തിൽപ്പെട്ട പക്ഷികൾ കൂറേ ദൂരം ഓടിയ ശേഷമാണ് പറന്നുയരാറുള്ളത്.

എല്ലാവർഷവും ആൽബടോ്രസിനെകുറിച്ച് വാർത്തകൾ വരാറുണ്ട്…. ആയുസ്സ് കൂടിയ പക്ഷി എന്ന നിലയിൽ വാർത്തകളിൽ ഇടം പിടിച്ച വിസ്ഡത്തിന്റെ പുതിയ കുട്ടിയുടെ വിവരങ്ങളറിയാനും നിരവധി പേരാണ് എത്തുന്നത്…..