ന്യൂഡൽഹി : ഇന്ത്യയിൽ നിന്നും നിരവധി യുവാക്കൾ ഐഎസിൽ ചേർന്നതായി റിപ്പോർട്ട്. ഇന്ത്യയിൽ മാത്രം ഐഎസിന്റെ മൂന്ന് മൊഡ്യൂളുകളാണ് പ്രവർത്തിക്കുന്നത്. ഈ സംഘടനകളിൽ യുവാക്കൾ മെമ്പർഷിപ്പ് എടുക്കുന്നതിന്റെ വീഡിയോകളാണ് ഇപ്പോൾ പുറത്ത് വരുന്നത്. ഇസ്ലാമിക് സ്റ്റേറ്റ് ഹിന്ദ് പ്രൊവിൻസിലൂടെയാണ് ഭീകര സംഘടന വീഡിയോ പുറത്തുവിട്ടത്.
ഇന്ത്യയിൽ ജിഹാദ് നടപ്പിലാക്കുമെന്ന് പ്രതിജ്ഞ ചെയ്തുകൊണ്ട് നിരവധി യുവാക്കൾ ഐഎസിൽ ചേർന്നുവെന്ന് വീഡിയോയിൽ പറയുന്നു. കൈയ്യിൽ തോക്കേന്തി, രാജ്യത്തിനെതിരെ പോരാടുമെന്ന് പ്രതിജ്ഞ ചെയ്യുന്നവരെയും വീഡിയോയിൽ കാണാം. മുഖം മൂടിക്കെട്ടി, കണ്ണുകൾ അവ്യക്തമാക്കിയാണ് വീഡിയോ പങ്കുവെച്ചിരിക്കുന്നത്. ഇന്റലിജൻസ് ഏജൻസികളെ കബളിപ്പിക്കാനുള്ള മറ്റൊരു മാർഗമാണിത്. ഇന്ത്യയിൽ നിന്ന് നിരവധി യുവാക്കൾ സംഘടനയിൽ ചേർന്നിട്ടുണ്ടെന്ന് ഐഎസ് ഭീകരൻ അബു തുറാബ് അൽ ഹിന്ദ് വീഡിയോയിലൂടെ പറയുന്നുണ്ട്. മാർച്ച് 25 ന് ടെലഗ്രാമിലൂടെയാണ് വീഡിയോ പുറത്തിറക്കിയത്.
രാജ്യത്ത് വീണ്ടും ഭീകരാക്രമണങ്ങൾ നടത്താനുള്ള പദ്ധതികളാണ് പാകിസ്താൻ ആസ്ഥാനമായ സംഘടനകൾ നടത്തുന്നതെന്ന് രഹസ്യാന്വേഷണ ഏജൻസികൾ വ്യക്തമാക്കുന്നു. കശ്മീരിൽ ഷൂട്ട് ചെയ്ത വീഡിയോയാണിത് എന്നാണ് സൈബർ വിദഗ്ധരുടെ കണ്ടെത്തൽ. എന്നാൽ പാകിസ്താനിൽ നിന്നാണ് ഇത് ടെലഗ്രാമിൽ അപ്ലോഡ് ചെയ്തിരിക്കുന്നത്. ജമ്മു കശ്മീരിൽ ഭീകരാക്രമണങ്ങൾ നടക്കുന്നതിനിടെയാണ് വീഡിയോ പങ്കുവെച്ചിരിക്കുന്നത് എന്ന കാര്യവും ശ്രദ്ധേയമാണ്. ഈ ആക്രമണങ്ങളുടെ ഉത്തരവാദിത്വവും ഐഎസ് ഏറ്റെടുത്തിട്ടുണ്ട്.
പാക് ചാരസംഘടനയായ ഐഎസ്ഐയുടെ സഹായത്തോടെയാണ് ഈ സംഘടനകൾ പ്രവർത്തിക്കുന്നത്. കശ്മീരിൽ ഭീകരാന്തരീക്ഷം സൃഷ്ടിച്ച് താഴ്വര പിടിച്ചടക്കാനുള്ള പാകിസ്താന്റെ ശ്രമത്തിന്റെ ഭാഗമാണിതെന്നാണ് കണ്ടെത്തൽ.
Comments