രാവിലെ അത്യാവശ്യമായി ഒരു യാത്രയ്ക്കിറങ്ങിയതാണ്. യുപിഐ വ്യാപകമാണെങ്കിലും കറൻസിയും ആവശ്യമായ കാലമാണ്. കഷ്ടകാലത്തിന് എടിഎം എടുത്തതുമില്ല. ആകെ വലഞ്ഞെന്ന് പറഞ്ഞാൽ മതിയല്ലോ..നമ്മൾ ഒരിക്കലെങ്കിലും ഈ അവസ്ഥ അനുഭവിച്ചിട്ടുണ്ടാകും.. ഇതിനെ മറികടക്കാൻ പുതിയ നിർദ്ദേശവുമായെത്തിയിരിക്കുകയാണ് റിസർവ്വ് ബാങ്ക്
എടിഎം കാർഡുകൾ ഉപയോഗിച്ചുള്ള പണം പിൻവലിക്കൽ രീതി ഇന്ന് സർവ്വ സാധാരണമാണ്. കൊറോണ സമയത്ത് യുപിഐ വഴിയുള്ള പണമിടപാടും എല്ലാവർക്കും പരിചിതമായി. ക്യുആർ കോഡ് സ്കാൻ ചെയ്തും മൊബൈൽ നമ്പർ വഴിയും ഗൂഗിൾ പേ, ഫോൺ പേ, പേടിഎം തുടങ്ങിയ ആപ്ലിക്കേഷനുകൾ വഴി പണമിടപാട് നടത്തുന്നവരാണ് ഏറെയും. ഈ സാഹചര്യത്തിൽ എടിഎമ്മിന്റെ ഉപയോഗവും മുൻപില്ലാത്തവിധം കുറഞ്ഞിട്ടുണ്ട്. ഇപ്പോഴിതാ എടിഎമ്മിൽ നിന്നും പണം പിൻവലിക്കാനും ഇതേ രീതി നടപ്പാക്കാനൊരുങ്ങുകയാണ് ആർബിഐ. എന്താണെന്നു വെച്ചാൽ എടിഎം കൗണ്ടറിൽ നിന്നും പണം പിൻവലിക്കാൻ ഇനി കാർഡ് ആവശ്യമില്ല.
യുപിഐ ഉപയോഗിച്ച് എല്ലാ ബാങ്കുകളിൽ നിന്നും എടിഎം നെറ്റുവർക്കുകളിൽ നിന്നും കാർഡ് രഹിത രീതിയിൽ പണം പിൻവലിക്കാനുള്ള സൗകര്യം ലഭ്യമാക്കും. രാജ്യത്തെ എല്ലാ ബാങ്കുകളിലെ എടിഎം വഴിയും കാർഡ് രഹിത പണം പിൻവലിക്കൽ നടപ്പിലാക്കും. റിസർവ്വ് ബാങ്ക് ഗവർണർ ശക്തികാന്ത ദാസാണ് ഇക്കാര്യം വ്യക്തമാക്കിയത്.
കാർഡ് രഹിത പിൻവലിക്കൽ രീതി എന്ന് പറയുമ്പോൾ തന്നെ നാല് സംശയങ്ങളാണ് പ്രധാനമായും മനസിൽ വരുന്നത്. എന്താണ് കാർഡ് രഹിത പണം പിൻവലിക്കൽ രീതി, ഈ പുതിയ രീതി എന്തിനാണ് ഉപയോഗിക്കുന്നത്, എങ്ങനെയാണ് ഇതുവഴി പണം പിൻവലിക്കുക, ഒരാൾക്ക് എത്രരൂപവരെ മിനിമം പിൻവലിക്കാം.
ഡെബിറ്റ്, ക്രെഡിറ്റ് കാർഡ് ഇല്ലാതെ തന്നെ എടിഎമ്മിൽ നിന്നും പണം പിൻവലിക്കാൻ സാധിക്കുന്ന രീതിയാണ് കാർഡ് രഹിത പണം പിൻവലിക്കൽ രീതി. എടിഎം കൗണ്ടറിൽ നിന്നും കാർഡ് ഇല്ലാതെ ഇതുവഴി പണം പിൻവലിക്കാൻ സാധിക്കും. ചില ബാങ്കുകളിൽ കാർഡ് രഹിത പണം പിൻവലിക്കൽ നിലവിലുണ്ട്. ഇത് മറ്റെല്ലാ ബാങ്കുകളിലേക്കും വ്യാപിപ്പിക്കാനാണ് റിസർവ് ബാങ്കിന്റെ തീരുമാനം.
എങ്ങനെയാണ് ഇതുവഴി പണം പിൻവലിക്കുന്നതെന്നാൽ, ഉപഭോക്താവിന്റെ കൈവശം ബാങ്കിൽ രജിസ്റ്റർ ചെയ്ത ഫോൺ നമ്പർ ഉള്ള മൈബൈൽ ഫോൺ ഉണ്ടായിരിക്കണം. കാർഡുകൾ കൈവശമില്ലാത്ത പക്ഷം എടിഎമ്മിൽ നിന്നും യുപിഐ വഴി പണം പിൻവലിക്കാനുള്ള മെസ്സേജ് ഫോണിൽ ലഭ്യമാകും. എടിഎമ്മിൽ കാർഡ് ഉപയോഗിക്കാതെയുള്ള ഓപ്ഷൻ തിരഞ്ഞെടുക്കണം. ശേഷം പിൻവലിക്കാൻ ആഗ്രഹിക്കുന്ന തുക പിൻവലിക്കൽ പരിധിക്കുള്ളിൽ നൽകണം. പിന്നാലെ മൊബൈൽ നമ്പറിൽ ഒടിപി വരും. ഈ ഒടിപി ഉപയോഗിച്ച് പണം പിൻവലിക്കാവുന്നതാണ്. ക്യുആർ കോഡ് സ്കാൻ ചെയ്തും പണം പിൻവലിക്കാൻ സാധിക്കും. ഇതിനായി അതത് ബാങ്കിന്റെ ആപ്പ് ഡൗൺലോഡ് ചെയ്യേണ്ടിതായി വരും.
കാർഡ് രഹിത രീതി വഴി പണമിടപാടുകൾ വേഗത്തിൽ നിർവ്വഹിക്കാൻ സാധിക്കുമെന്നതാണ് ഒരു പ്രത്യേകത. കൂടാതെ എടിഎം തട്ടിപ്പുകൾ തടയാനും ഇതുവഴി സാധിക്കും. ഏറ്റവും പ്രധാനപ്പെട്ടത് എന്താണെന്ന് വെച്ചാൽ കാർഡ് എടുക്കാൻ മറന്നാലോ മറ്റൊ ഫോൺ ഉണ്ടെങ്കിൽ നമുക്ക് പണം പിൻവലിക്കാൻ സാധിക്കും എന്നതാണ്. ഇത്തരത്തിലുള്ള പ്രതിദിന ഇടപാടിന് പരിധിയും ആർബിഐ നിശ്ചയിച്ചിട്ടുണ്ട്. 5,000 മുതൽ 20,000 രൂപ വരെയാണ് ഇങ്ങനെ പിൻവലിക്കാൻ അനുവദിക്കുന്നത്. എന്നാൽ ഓരോ ബാങ്കുകളിലും ഈ പരിധി വ്യത്യാസമായിരിക്കും.
ലോകം വിരൽത്തുമ്പിൽ കൊണ്ടുവന്ന ഇന്റർനെറ്റിന്റെ വിശാലതയാണ് പണമിടപാടുകളും നമ്മുടെ വിരൽത്തുമ്പിൽ എത്തിക്കുന്നത്. ഇനി അങ്ങോട്ട് എടിഎം കാർഡുകളുടെ ഭാരമില്ലാത്ത കീശയുമായി നടക്കാമെന്നർത്ഥം.
