ഇന്ത്യൻ സിനിമാ ലോകത്ത് ബാഹുബലിക്ക് ശേഷം ഏറ്റവുമധികം കാത്തിരിപ്പ് ഉയർത്തിയ സീക്വൽ ആയിരുന്നു യഷ് നായകനായെത്തുന്ന കെജിഎഫ്. കഴിഞ്ഞ 14 ന് ചിത്രം റിലീസ് ആയതോടെ തിയേറ്ററുകൾ പൂരപ്പറമ്പായി മാറി. ആരാധകരുടെ ആവേശം ഒട്ടും കെടുത്താതെയാണ് റോക്കി ഭായ് സ്ക്രീനിൽ നിറഞ്ഞാടിയത്. മൂന്ന് ദിവസമായപ്പോഴേക്കും 400 കോടി ക്ലബ്ബിൽ കയറി. അതോടൊപ്പം ചിത്രത്തിന്റെ മൂന്നാം ഭാഗത്തെ കുറിച്ചുള്ള ചർച്ചകളും ആരാധകർക്കിടയിൽ നടക്കുന്നുണ്ട്.
കെജിഎഫ് ചാപ്റ്റർ 2 ന്റെ ടെയ്ൽ എൻഡിലാണ് മൂന്നാം ഭാഗത്തെക്കുറിച്ചുള്ള സൂചന നൽകുന്നത്. എന്നാൽ ഇത് സത്യമാണോ എന്ന ആശയക്കുഴപ്പത്തിലാണ് ആരാധകർ. സിനിമയുടെ പ്രമോഷൻ സമയത്ത് സംവിധായകൻ പ്രശാന്ത് നീൽ നൽകിയ പ്രതികരണവും ആരാധകരെ സംശയത്തിലാഴ്ത്തി. ചിത്രത്തിന്റെ അടുത്തൊരു ഭാഗം പുറത്തിറക്കണമെങ്കിൽ ഇനിയൊരു എട്ട് വർഷം സമയമെങ്കിലും എടുക്കുമെന്നായിരുന്നു തമാശ രൂപത്തിൽ അദ്ദേഹം പറഞ്ഞത്.
എന്നാൽ ചിത്രത്തിന് ഒരു മൂന്നാം ഭാഗം ഉണ്ടാവുമെന്ന് അറിയിച്ചിരിക്കുകയാണ് എക്സിക്യൂട്ടീവ് പ്രൊഡ്യൂസർ ആയ കാർത്തിക് ഗൗഡ. അതിന്റെ പ്രി പ്രൊഡക്ഷൻ ഇതിനോടകം തന്നെ ആരംഭിച്ചുകഴിഞ്ഞെന്ന് കാർത്തിക് ഗൗഡ പറഞ്ഞു. ഈ പ്രോജക്റ്റ് സംബന്ധിച്ച കൂടുതൽ വിവരങ്ങൾ വരും ആഴ്ചകളിൽ പുറത്തെത്തിയേക്കും എന്ന സൂചനകളും ലഭിക്കുന്നുണ്ട്. ഇതോടെ മൂന്നാം ഭാഗത്തെ റോക്കി ഭായിയുടെ ആവേശകരമായ ആക്ഷൻ രംഗങ്ങൾക്കായി കാത്തിരിക്കുകയാണ് ആരാധകർ. റോക്കി ഭായ് വിദേശ രാജ്യങ്ങളിൽ നടത്തിയ പ്രവർത്തനങ്ങളാവും ഈ ഭാഗത്തിലുണ്ടാകുമെന്നാണ് സൂചന.
