ഏവരെയും അമ്പരിപ്പിക്കുന്ന വിധത്തിൽ മിടുക്ക് കാട്ടുന്ന ധാരാളം പ്രതിഭകൾ നമുക്ക് ചുറ്റിനുമുണ്ട്. ഇതുവരെയും ആരാലും അംഗീകരിക്കപ്പെടാതിരുന്ന അത്തരം ആളുകൾ ഇന്ന് സമൂഹമാദ്ധ്യമങ്ങളിലൂടെ പ്രശസ്തരാകാറുമുണ്ട്. തങ്ങളുടെ കഴിവുകൾ പ്രദർശിപ്പിക്കാനും, അതുവഴി അംഗീകരിക്കപ്പെടാനുമുള്ള അവസരങ്ങൾ ഇന്ന് കലാകാരന്മാർക്ക് സമൂഹമാദ്ധ്യമങ്ങളിലൂടെ ലഭിക്കാറുണ്ട്. അത്തരത്തിൽ ഒരു കലാകാരി ഒരുക്കിയ സൃഷ്ടിയാണ് സമൂഹമാദ്ധ്യമങ്ങളിൽ വൈറലായിരിക്കുന്നത്.
പുക പാറുന്ന കാപ്പിയും, ഒപ്പം കുറച്ച് കാപ്പി കുരുവും, തമിഴ് ദിനപത്രവും. ആദ്യ കാഴ്ചയിൽ പ്രഭാതത്തെ അനുസ്മരിപ്പിക്കുന്ന ഒരു മനോഹര ചിത്രമായി തോന്നാം. എന്നാൽ ഇത് വെറുമൊരു ചിത്രമല്ല, ഒരു യുവ കലാകാരിയുടെ പെയിന്റ് ബ്രഷിൽ
വിരിഞ്ഞ നിറച്ചാർത്താണ്. ചിത്രം കണ്ടവർ ഇത് പെയിന്റിംഗ് ആണെന്ന് ആദ്യം വിശ്വസിച്ചില്ല. അതിനാൽ, ചിത്രം വരച്ച വീഡിയോയും കലാകാരി പങ്കുവെച്ചു.
the timelapse! follow my insta @/eigteenpercentgray 🥺♥️ pic.twitter.com/Cfqgi9hX3Z
— V (@VforVendakka_) April 21, 2022
ചെന്നൈ സ്വദേശിയായ ഫോട്ടോഗ്രാഫറും ആർട്ടിസ്റ്റുമായ വരുണ ശ്രീധറാണ് ഈ സൃഷ്ടിയ്ക്ക് പിന്നിൽ. ‘വി ഫോർ വെണ്ടക്ക’ എന്ന പേരിലുള്ള ട്വിറ്റർ അക്കൗണ്ടിലാണ് ഇവർ ചിത്രങ്ങളും വീഡിയോയും പങ്കുവെച്ചത്. നിരവധി ആളുകളാണ് കലാസൃഷ്ടിയ്ക്ക് അഭിനന്ദനങ്ങളുമായി രംഗത്തെത്തിയത്. പലർക്കും ഇത് പെയിന്റിംഗ് ആണെന്ന് വിശ്വസിക്കാനായില്ല. ഇത് വ്യജമാണെന്ന് പോലും ചിലർ വാദിച്ചുവെന്നാണ് ചിത്രകാരി പറയുന്നത്. അതിന് ശേഷമാണ് പെയിന്റ് ചെയ്യുന്ന വീഡിയോ ഇവർ പങ്കുവെച്ചത്.
