പാലക്കാട്: സ്വകാര്യ ഹോഴ്സ് റൈഡിംഗ് അക്കാദമിയിൽ നിന്നും ഏഴ് കുതിരകൾ ചാടിപ്പോയി. ഇന്നലെ രാത്രി 11 മണിയോടെയാണ് സംഭവം. കുതിരാന് സമീപം ഇരുമ്പുപാലത്തെ സ്വകാര്യ ഹോഴ്സ് റൈഡിംഗ് അക്കാദമിയിൽ നിന്നാണ് കുതിരകൾ ചാടിപ്പോയത്. ദേശീയപാതയിലൂടെ ഓടിയ കുതിരകളിൽ മൂന്നെണ്ണത്തിനെ വാഹനമിടിച്ചു.
അപകടത്തിൽപ്പെട്ട കുതിരകളിൽ ഒന്ന് ചത്തു, മറ്റൊന്നിന്റെ നില ഗുരുതരമാണ്. കുതിരയുമായി കൂട്ടിയിടിച്ച് ബൈക്ക് യാത്രക്കാരന് ഗുരുതരമായി പരിക്കേറ്റു. പട്ടിക്കാട് സ്വദേശി നിതീഷ് കുമാറി(21)നാണ് പരിക്കേറ്റത്. ഇയാളെ തൃശ്ശൂർ ജനറൽ ആശുപത്രിയിൽ പ്രവേശിപ്പിച്ചു. മേലേചുങ്കത്ത് വെച്ചാണ് നിതീഷ് അപകടത്തിൽപ്പെട്ടത്.
കുന്നുംപുറം ബാബുവിന്റെ ഉടമസ്ഥതയിലുള്ള ഹോഴ്സ് റൈഡിംഗ് അക്കാദമിയിലെ കുതിരകളാണ് ലായത്തിൽ നിന്നും ചാടിപ്പോയത്. കാട്ടാനയുടെ ശബ്ദം കേട്ട് പരിഭ്രാന്തരായാണ് കുതിരകൾ ലായത്തിൽ നിന്നും ചാടിപ്പോയതെന്നാണ് സൂചന. ഓട്ടത്തിനിടെ വാണിയമ്പാറ, മേലേചുങ്കം, മേരിഗിരി എന്നിവിടങ്ങളിൽ വെച്ചാണ് കുതിരകൾ വാഹനങ്ങളുമായി ഇടിച്ച് അപകടമുണ്ടായത്. ബാക്കി കുതിരകളെ നാട്ടുകാരുടെ സഹായത്തോടെ പിടിച്ചുകെട്ടി. പീച്ചി റിസർവോയറിനോട് ചേർന്നാണ് കുതിരയോട്ട പരിശീലന കേന്ദ്രം സ്ഥിതി ചെയ്യുന്നത്.
Comments