ശത്രുക്കളെ കണ്ടാൽ വാലുമുറിച്ചോടുന്ന സാധാരണ പല്ലിയല്ല: സ്വന്തം കണ്ണിൽ നിന്ന് രക്തം ചീറ്റിച്ച് ശത്രുക്കളെ ഓടിക്കുന്ന ഡ്രാക്കുളപല്ലി:വീഡിയോ കാണാം

ജീവന്റെ തുടിപ്പിനേക്കാൾ മൂല്യമേറിയതായി ഈ ലോകത്ത് ഒന്നുമില്ല അല്ലേ? ജീവൻ രക്ഷിക്കാൻ ഏതറ്റം വരേയും പോകും, അത് മനുഷ്യനായലും ശരി, മറ്റു ജീവജാലങ്ങളായാലും ശരി സ്വന്തം ജീവനേയും സാമ്രാജ്യത്തെയും രക്ഷിക്കാൻ വേണ്ടി ഉഗ്ര പ്രഹരശേഷിയുള്ള ആയുധങ്ങളേന്തിയുള്ള പടയാളികളെ അണിനിരത്തന്നുന്ന രാജാക്കൻമാരേയും മറ്റും കണ്ടിട്ടില്ലേ? ഇത് മനുഷ്യരുടെ കാര്യം. നമുക്ക് ചുറ്റുമുള്ള മൃഗങ്ങൾക്കുമുണ്ട് ജീവൻ രക്ഷിക്കാനുള്ള മാർഗങ്ങൾ.

പല്ലും നഖവും എന്തിനേറെ പറയുന്നു സ്വന്തം ശരീരത്തെ മുള്ളുകൾ ഉയർത്തി വിറപ്പിച്ച് ശത്രുക്കളിൽ നിന്ന് രക്ഷ തേടുന്ന മുള്ളൻപന്നികളെ കണ്ടിട്ടില്ലേ? ഇത്തരത്തിൽ ശത്രുക്കളിൽ നിന്ന് രക്ഷ തേടാൻ ഒരു അടിപൊളി ടെക്‌നിക് പ്രയോഗിക്കുന്ന ഒരു ജീവിയെ ആണ് ഇന്ന് നമ്മൾ പരിചയപ്പെടാൻ പോകുന്നത്. ആളൊരു ഇത്തിരി കുഞ്ഞൻ പല്ലിയാണ്.

നമ്മുടെ ചുറ്റു വട്ടത്ത് കാണുന്ന വാലുമുറിച്ചോടുന്ന പല്ലിയല്ല, സ്വന്തം ചോര കൊണ്ട് ശത്രുക്കളെ പേടിപ്പിക്കുന്ന ഹോർന്ഡ് ലിസാർഡിനെ പറ്റിയാണ് ഇന്ന് പറയാൻ പോകുന്നത്. പല്ലി വർഗത്തിൽ പെട്ടതാണെങ്കിലും ഹോർന്ഡ് ലിസാർഡിന്റെ രൂപവും ഭാവവും കണ്ടാൽ ആളൊരു തവളയാണെന്ന് തോന്നും. വടക്കേ അമേരിക്ക ജന്മദേശമായ ഇവയുടെ ശരീരവും മൂക്കുകളും എല്ലാം പരന്നതും തലയുടെ പല ഭാഗങ്ങളിൽ കുഞ്ഞു കുഞ്ഞു കൊമ്പുകളുമുണ്ട്. അത് കൊണ്ടാണ് ഇവയ്‌ക്ക് കൊമ്പുള്ള പല്ലി അതവാ ഹോർന്ഡ് ലിസാർഡ് എന്ന് പേര് വന്നത്.

പല്ലി വർഗത്തിൽപ്പെട്ടതായതു കൊണ്ട് തന്നെ ശത്രുക്കളുടെ എണ്ണവും ധാരളമായിരിക്കുമെന്ന് ഉറപ്പായിരിക്കുമല്ലോ? എന്നാൽ ശത്രുക്കളിൽ നിന്ന് രക്ഷ തേടാൻ ഇവരുടെ കൈവശം ഒരുഗ്രൻ ടെക്‌നിക്കുണ്ട്. അത് കണ്ടാൻ ആരുമൊന്ന് ഞെട്ടിപ്പോവും. എന്താണ് ഹോർന്ഡ് ലിസാൻഡിന്റെ വിദ്യ എന്നല്ലേ? ശത്രുക്കൾ ആക്രമിക്കാനൊരുങ്ങുമ്പോൾ കണ്ണിൽ നിന്ന് രക്തം ചീറ്റിയാണ് ഇവ പ്രതിരോധിക്കുന്നത്.

ഈ പല്ലികളുടെ കണ്ണിലുള്ള മസിലുകളെ ആവശ്യാനുസരണം നിയന്ത്രിയ്‌ക്കാൻ ഇവയ്‌ക്ക് സാധിക്കുന്നതിനാലാണ് ഇത്തരത്തിൽ രക്തം ചീറ്റൽ സാധ്യമാകുന്നത്. അപകടം മണത്താൽ അവയുടെ കണ്ണുകൾക്ക് ചുറ്റുമുള്ള പേശികൾ ചുരുങ്ങാൻ തുടങ്ങും. ഇത് ഹൃദയത്തിലേക്കുള്ള രക്തയോട്ടം തടസ്സപ്പെടുത്തുന്നു. ഇത് കണ്ണിന്റെ ഭാഗത്തേക്ക് രക്തം ഒഴുകുന്നതിന് കാരണമാവും. കണ്ണിന്റെ ഭാഗത്ത് രക്തം നിറഞ്ഞാൽ അവ വീണ്ടും പേശികളെ അതിവേഗം സങ്കോചിപ്പിക്കുകയും കണ്ണിന്റെ ഭാഗത്തുള്ള രക്തം നിറഞ്ഞ നേർത്ത സൈനസ് മെംബ്രണുകൾ പൊട്ടിക്കുന്നു.

അങ്ങനെ രക്തം രക്തം വരുന്നു. രക്തം കണ്ണിലൂടെ ഒഴുകുകയല്ല. ഏകദേശം മൂന്നടി വരെ ഒരേ ദിശയിൽ ഇവ സ്വന്തം രക്തം ചീറ്റും. ഒരേ സമയം പല വണ ഈ രീതിയിൽ ഇവയ്‌ക്ക് രക്തം ചീറ്റാൻ സാധിക്കും. ഒപ്പം തന്നെ കരണം മറിയുകയും ചെയ്യും. പ്രധാനമായും പാമ്പുകളിൽ നിന്ന് രക്ഷ തേടാനാണ് ഇവ കരണം മറിച്ചിൽ പ്രയോഗിക്കുന്നത്. ഇങ്ങനെ രക്തം ചീറ്റുന്നത് കൊണ്ട് തന്നെ ഇവയ്‌ക്ക് ബ്ലഡ് ഷൂട്ടിംഗ് ഹോർന്ഡ് ലിസാർഡ് എന്ന പേരും കൂടിയുണ്ട്. വിചിത്രം തന്നെ അല്ലേ? ഇത് പോലെ സ്വന്തം ജീവൻ രക്ഷിക്കാൻ കൗതുകകരമായ ടെക്‌നിക്കുകൾ പ്രയോഗിക്കുന്ന വേറേയും ജീവികളുണ്ട് നമുക്ക് ചുറ്റും