തൃശ്ശൂർ: തൃശ്ശൂർ പൂരം വെടിക്കെട്ട് വീണ്ടും മാറ്റിവെച്ചു. ശക്തമായ മഴയുടെ പശ്ചാത്തലത്തിലാണ് ഇന്ന് നടത്താനിരുന്ന വെടിക്കെട്ട് വീണ്ടും മാറ്റിയത്. ഇന്ന് വൈകീട്ട് ആറരയ്ക്കായിരുന്നു വെടിക്കെട്ട് നടത്താൻ തീരുമാനിച്ചിരുന്നത്.
തൃശ്ശൂരിൽ ഇന്ന് ശക്തമായ മഴ ലഭിക്കുമെന്ന് കാലാവസ്ഥാ നിരീക്ഷണ കേന്ദ്രം നേരത്തെ മുന്നറിയിപ്പ് നൽകിയിരുന്നു. എങ്കിലും ഇന്ന് വെടിക്കെട്ട് നടത്താനുള്ള തീരുമാനത്തിലായിരുന്നു തിരുവമ്പാടി-പാറമേക്കാവ് ദേവസ്വങ്ങൾ. എന്നാൽ മഴ കനത്തതോടെ വെടിക്കെട്ട് നടത്താനുള്ള നീക്കം ഉപേക്ഷിക്കുകയായിരുന്നു.
ഇക്കാര്യം ഇരു ദേവസ്വങ്ങളും ജില്ലാ ഭരണകൂടത്തെ അറിയിക്കും. ഇതിന് ശേഷമാകും ഇതുമായി ബന്ധപ്പെട്ട് ഔദ്യോഗിക പ്രഖ്യാപനം ഉണ്ടാകുക. വെടിക്കെട്ട് എന്ന് നടക്കുമെന്ന കാര്യം പിന്നീട് അറിയിക്കുമെന്ന് ഇരു ദേവസ്വങ്ങളും അറിയിച്ചു.
11 ന് രാവിലെയോടെയായിരുന്നു വെടിക്കെട്ട് നടത്തേണ്ടിയിരുന്നത്. മഴ കാരണം ഇത് അന്ന് വെെകീട്ടത്തേക്ക് മാറ്റുകയായിരുന്നു. എന്നാൽ കനത്ത മഴ തുടർന്നതിനാൽ വീണ്ടും വെടിക്കെട്ട് മാറ്റിവയ്ക്കുകയായിരുന്നു.
