തൃശൂർ: കാലാവസ്ഥ അനുകൂലമായാൽ വെള്ളിയാഴ്ച വൈകിട്ട് തൃശൂർ പൂരം വെടിക്കെട്ട് നടത്തിയേക്കും. ജില്ലാ ഭരണകൂടവുമായി നടത്തിയ കൂടിയാലോചനകൾക്കും സുരക്ഷാ കാര്യങ്ങൾ വിലയിരുത്തിയതിനും ശേഷമാണ് ഇരുദേവസ്വങ്ങളും വെള്ളിയാഴ്ച വെടിക്കെട്ട് നടത്താൻ തീരുമാനിച്ചത്. വ്യാഴാഴ്ച രാത്രിയും വെള്ളിയാഴ്ച പകലും മഴ ഒഴിഞ്ഞു നിൽക്കുമെന്ന പ്രതീക്ഷയിലാണ് ദേവസ്വങ്ങളുടെ തീരുമാനം.
മഴ ശക്തമായതിന്റെ പശ്ചാത്തലത്തിൽ നിരവധി തവണ മാറ്റിവെച്ച തൃശൂർ പൂരം വെടിക്കെട്ടാണ് വെള്ളിയാഴ്ച നടത്താനിരിക്കുന്നത്. രണ്ട് വർഷത്തെ ഇടവേളയ്ക്ക് ശേഷം ആഘോഷമായി നടന്ന തൃശൂർ പൂരത്തിന്റെ വെടിക്കെട്ട് മാത്രം മഴ മൂലം നടത്താൻ കഴിയാതെ വരികയായിരുന്നു. പൂരം ദിനമായിരുന്ന മെയ് 10ന് കുടമാറ്റം നടക്കുന്ന സമയത്തോട് അടുത്താണ് മഴ ആരംഭിച്ചത്. ഇതോടെ പിറ്റേന്ന് പുലർച്ചെ നടത്തേണ്ടിയിരുന്ന വെടിക്കെട്ട് മുടങ്ങുകയായിരുന്നു.
അതേസമയം തൃശൂർ ജില്ലയുടെ വിവിധ ഭാഗങ്ങളിൽ മഴ മൂലം നിരവധി നാശനഷ്ടങ്ങൾ റിപ്പോർട്ട് ചെയ്തു. നാട്ടികയിൽ തെങ്ങ് വീണ് വീട് തകർന്നു. മഴയുടെ പശ്ചാത്തലത്തിൽ വ്യഷ്ടി പ്രദേശങ്ങളിലും താഴ്ന്ന് കിടക്കുന്ന സ്ഥലങ്ങളിലും അതീവ ജാഗ്രത വേണമെന്ന് ജില്ലാ കലക്ടർ ഹരിത വി കുമാർ അറിയിച്ചു.
Comments