കേക്കിൽ മുട്ടയുണ്ടോയെന്ന് ചോദിച്ചു; കസ്റ്റമറെ ഞെട്ടിക്കുന്ന ഉത്തരം നൽകി കടയുടമ

ഓൺലൈൻ ഫുഡ് ഡെലിവറി ആപ്പുകൾ വന്നതോടെ മൊബൈലിൽ വിരലൊന്ന് അമർത്തിയാൽ അവശ്യസാധനങ്ങൾ വീടിന്റെ പടിക്കലെത്തും. ഇതിനെക്കുറിച്ച് ആളുകൾക്ക് മികച്ച അഭിപ്രായമാണെങ്കിലും ചിലപ്പോഴൊക്കെ പണി കിട്ടാറുമുണ്ട്. ഓൺലൈൻ ഭക്ഷണവിതരണ പ്ലാറ്റ്ഫോമായ സ്വിഗ്ഗിയിലൂടെ കേക്കിന് ഓർഡർ ചെയ്ത് പണി കിട്ടിയ ആളുടെ അനുഭവമാണ് ഇപ്പോൾ വൈറലാകുന്നത്. കപിൽ വാസ്നിക് എന്നയാളാണ് ട്വിറ്ററിൽ തന്റെ അനുഭവം പങ്കുവെച്ചിരിക്കുന്നത്.

സ്വിഗ്ഗി വഴി നാഗ്പുരിലുള്ള പ്രശസ്തമായ ഒരു ബേക്കറിയിൽ നിന്നാണ് കപിൽ കേക്ക് ഓർഡർ ചെയ്തത്. കേക്ക് തയ്യാറാക്കുമ്പോൾ മുട്ട ചേർത്തിട്ടുണ്ടെങ്കിൽ അത് പ്രത്യേകം പറയണമെന്ന് ഓർഡർ നൽകുമ്പോൾ തന്നെ കപിൽ അറിയിച്ചിരുന്നു. എന്നാൽ കേക്ക് കൈയ്യിൽ കിട്ടിയപ്പോൾ ഒന്നും പറയാൻ പറ്റാത്ത അവസ്ഥയാണിപ്പോഴെന്ന് അദ്ദേഹം ട്വിറ്ററിൽ കുറിച്ചു. കേക്കിന് മുകളിൽ മുട്ട ചേർത്തിട്ടുണ്ടെന്നാണ് എഴുതിവെച്ചിരിക്കുന്നത്.

So I ordered a cake from a renowned bakery in Nagpur, through #Swiggy. In the order details I mentioned “Please mention if the cake contains egg”. I am speechless after receiving the order 👇🏼 pic.twitter.com/WHN0Ht20r0

— Kapil Wasnik (@kapildwasnik) May 20, 2022

ഇത് വൈറലായതോടെ സംഭവത്തിൽ കപിലിനോട് മാപ്പ് ചോദിച്ചുകൊണ്ട് സ്വിഗ്ഗി രംഗത്തെത്തി. കപിലിന്റെ നിർദേശം കൃത്യമായി മനസ്സിലാക്കാൻ ബേക്കറി ഉടമയ്‌ക്ക് മനസ്സിലാകാതെ പോയതാണ് ഇതിന് കാരണമെന്നാണ് സ്വിഗ്ഗിയുടെ വിശദീകരണം. സംഭവത്തിൽ കൂടുതൽ അന്വേഷണം നടത്താൻ സമയം തരണമെന്നും ഓഡർ ഐ.ഡി. പങ്കുവയ്‌ക്കാനും സ്വിഗ്ഗി ആവശ്യപ്പെട്ടു.