ഡൽഹി: രാജ്യത്ത് കൊറോണ കേസുകളിൽ വർദ്ധനവ് തുടരുന്നു. ആരോഗ്യ മന്ത്രാലയം പുറത്തുവിട്ട ഏറ്റവും പുതിയ കണക്കുകൾ പ്രകാരം കഴിഞ്ഞ 24 മണിക്കൂറിനുള്ളിൽ ഇന്ത്യയിൽ റിപ്പോർട്ട് ചെയ്തത് 4,518 പുതിയ കേസുകളാണ്. 24 മണിക്കൂറിനുള്ളിൽ 1,730 കേസുകളുടെ വർദ്ധനവാണ് രാജ്യത്ത് രേഖപ്പെടുത്തിയത്. ഇതോടെ രാജ്യത്ത് റിപ്പോർട്ട് ചെയ്ത ആകെ കൊറോണ കേസുകളുടെ എണ്ണം 4,31,81335 ആയി.
24 മണിക്കൂറിനിടെ രേഖപ്പെടുത്തിയത് 9 മരണങ്ങളാണ്. മൊത്തം മരണസംഖ്യ 5,24,701 ആയി ഉയർന്നു. നിലവിൽ രാജ്യത്ത് 25,782 സജീവ കേസുകളാണ് ഉള്ളത്. രാജ്യത്ത് ഇന്ന് 2,779 പേർ രോഗമുക്തി നേടിയതോടെ ആകെ രോഗമുക്തി നേടിയവരുടെ എണ്ണം 4,26,30,852 ആയി.
ഒരു ശതമാനത്തിന് മുകളിലാണ് രോഗസ്ഥിരീകരണനിരക്ക്. 34 ദിവസത്തിനുശേഷമാണ് പോസിറ്റിവിറ്റി നിരക്ക് ഒന്നിനുമുകളിൽ എത്തുന്നത്. എന്നാൽ, കേസുകളിലെ വർധനയിൽ ആശങ്കപ്പെടേണ്ടതില്ലെന്നും നാലാംതരംഗത്തിന്റെ സൂചനയല്ല ഇതെന്നും ഐ.സി.എം.ആർ. അഡീഷണൽ ഡയറക്ടർ ജനറൽ സമീരൻ പാണ്ഡ പറഞ്ഞു.
ജില്ലാതലത്തിൽ ജാഗ്രതപാലിക്കണം. അഞ്ചുസംസ്ഥാനങ്ങളിലെ ഏതാനും ജില്ലകളിൽ മാത്രമാണ് കേസുകൾ വർധിക്കുന്നതെന്നും ഈ സംസ്ഥാനങ്ങളിൽ മൊത്തത്തിൽ രോഗവ്യാപനം റിപ്പോർട്ടുചെയ്തിട്ടില്ലെന്നും അദ്ദേഹം ചൂണ്ടിക്കാട്ടി.
